Savissivimmi tunisassiorfik ingerlanngilaq
Paasisat taamaattut peqqutigalugit Aningaasaqarnermut Ataatsimiititaliap Arctic Green Food-imik kiffartuussinissamut isumaqatigiissutip nalilersoqqinneqarnissaa piumasaqaatigiitigalugu, Ataatsimiititaliap Arctic Green Foodimik kiffartuussinissamut isumaqatigiissut nutaaq akuersaaraa, Aningaasaqarnermut Ataatimiititaliap siulittaasua Augusta Salling nalunaarpoq.
Isumaqatigiissutip suliarineqarnissaa siuartittariaqarsimavoq ilaatigut Arctic Green Foodip Kangerlussuarmi tunisassiorfik matummagu piniartut tunisisinnaajunnaarmata.
Aningaasaqarnermut Ataatsimiititaliaq AGF-ip tunisassiorfiata matuneqarneranut pisuunnginnerarpoq, Ataatsimiititaliap ukiumoortumik aningaasaqarnermut inatsimmut siunnersuutigineqartut naapertorlugit pisortat tapiissutigisartagaasa nakkutigineqarnissaat akisussaaffigigamikkit.
Kiffartuussinissamik isumaqatigiissut naapertorlugu tunisassiorfinni qulingiluani tunisassiorfik ataaseq ullormut 6.000 koruuninik tapiiffigineqartarpoq.
Taamaalillunilu kiffartuussinissamik isumaqatigiissutit aqqutigalugit pisortat akiliutigisartagaat AGF-ip tunitsiviini ingerlanneqartut annertussusaannut sanilliullutik annertuallaarujussuartut ersarilluinnarpoq – Aningaasaqarnermut Ataatsimiititaliaq 2008-mut aningaasanut inatsisissatut siunnersuutip aappassaaneerneqarneranut isumaliutissiissummini ilaatigut taama allappoq.
Ataatsimiititaliaq isummersuutai Naalakkersuisunit ukiaq tamakkiisumik tapersersorneqarput, kiffartuussinissamik isumaqatigiissutit naapertorlugit tapiissutaasartut inuiaqatigiinnut iluaqutaanerunissaat pisariaqarmat.
Ataatsimiititaliap akisussaaffigisani naapertorlugit isumaqatigiissut pillugu itisiliilluni akissuteqaammik Arctic Green Foodimit piniarsimavoq, suliffeqarfiullu siulersuisuisa tapiissutit apparnissaat ilimagalugu qanoq iliuuseqarnissaminnut piffissaqarluarnikuupput.
Siunissaq eqqarsaatigalugu Aningaasaqarnermut Ataatsimiititaliap siunnersuutigaa kiffartuussinissanik isumaqatigiissutit naapertorlugit tapiissutigineqartartussat kommunerujussuarnut tapiissutaasartussanut ilanngunneqartalissasut.
Kommunet pissutsinut ilisimaarinninnertik aallaavigalugu tapiissutit qanoq inuiaqatigiinnut iluaqutaanerusinnaanerat nalunnginerussammassuk, Ataatsimiititaliaq taamatut siunnersuuteqarpoq.
