Savissivimmi puiseqanngimmat piniartut amernik tunisassaqanngillat

Puisit amiisa akii ippassaq akitsorneqarput, tamannali Savissivimmi piniartunut sunniuteqarsinnaanngilaq imarorsimanera peqqutigalugu puiseqanngimmat, taama Savissivimmi nunaqarfiup aqutsisuini siulittaasoq Qaarngaaq Nielsen oqarpoq.

- Massakkut puisit akuttorsimasorujussuupput, novemberi ingerlatilaalersoq sikugaluaratta, kisianni septemberi ingerlatilersoq kujataa anorersuartarneratigut maanga malissuit anngunnikuugamik imarorlutalu, massakkut sikuniarsarileraluarpoq. Kisianni tassa imaroraangami ileqqorigamiuk sikusinnarluni imaroraangami puisaaruttarpoq, massakkut tassa puiseqanngilagut!

- Ippassaminngaanniit aallartittumik puisit amiisa akii qaffariaateqaqqipput, tamanna piniartunut juulleriartornerani iluaqutaassasoraajuuk?

- Suu, tassa iluaqutaassagaluarpoq kisianni tassa oqareerpunga puisit akuttorsimaarput taamaattaramik imaq sikuugaluarsinnarluni imaroraangat. Massakkut ataasiakkaannguit pisaqatsiartarput, assersuutigalugu uanga ippassaani qassutikka qulit alakkaraluarpakka soqanngillat, aamma imaq aalalaartuarami avataa imaagunarnermut piniartut ilai pisaqartanngillat ullorpassuarni puisit akuttorsimaarnerat peqqutigalugu, taama Qaarngaaq Nielsen oqarpoq.

Savissivik 70-t missaanni inoqarpoq, taakkunannga piniartut 15-t missaanniipput.

Nunaqarfimmilu allaffimmiup oqarnera naapertorlugu, piniartut arlallit siornatigut kommunimut ikiortissarsiortuunngitsut, aningaasanik ikiorserneqarnissaminnik saaffiginnissuteqarsimapput.

Qaarngaaq Nielsen erseqqissaavoq, maanna avannaani kaperlanneq pissutigalugu ulloq atorlugu piniarsinnaanatik, piniassagunilli taamaallaat qassutit atorlugit piniarsinnaallutik.

Puisip amia 100 koruunimik naleqartinneqaraluarpoq, maannali puisip amia masattoq 215 koruunimik naleqartinneqalerpoq.

- Piniartut puisit akuttorsimaanerisa nalaani inuuniarnerat soorlu ikummatissatigut allatigullu ajornartorsiuteqarput assorsuaq. Imarorsimanngikkaluarpat immaqa ajornartorsiuteqassanngikkaluarput soorlu assersuutigalugu Qaanaarmiut qaattaarpalupput taakkua imarunnginnamik uagut maani puiseqanngilagut, tassa taama assigiinngitsigipput, Qaarngaaq Nielsen oqarpoq.

Piniartut qitornallit eqqugaanerusimassasut Qaarngaaq Nielsenip aamma erseqqissaatigaa.