Politiit ullormut nalunaarutaat: Savimmik kapisinerit, pinngitsaaliineq suliallu imigassartorsimanermut attuumassuteqartut 70-init amerlanerusut

Upernavimmi arnaq 22-nik ukiulik ippassaq unnukkut imigassartortunut ilaareerluni ullaaq iterpoq.

Ajortoqartorli ingerlaannaq malugisinnaavaa. Politiinut kinguninngua sianerpoq, angullu 39-nik ukiulik pinngitsaaliisimasutut nalunaarutigalugu.

Angut arfininngormat sassartinneqarpoq, erngertumillu pineqaatissinneqarluni. Angut pineqaatissinneqarsimasunut qaammatini arfinilinni inissiisarfimmiittussanngortinneqarpoq. Politiit pigaartuisa pisortaat Poul Kreutzmann taama paasissutissiivoq.

Uppernarsaatit qularnanngimmata, suliaq sukkasuumik ingerlanneqarsinnaasimasoq, politiit paasissutissiissutigaat.

Akuersissuteqarnissamut inatsit siorna atuutilersoq naapertorlugu, pinngitsaaliinermut suliaq nakuusernertaqartariaqanngilaq. Illuatungeriit atoqatigiinnginnermi akuersinermik maanna nalunaaruteqartoqaqqaartussaapput. Illuatungeriinni ataaseq akuersisimanngippat, pinngitsaaliinermik suliaq aallartinneqarsinnaavoq. Assi © : Ólafur Steinar Gestsson/Ritzau Scanpix

Savimmik nunaqarfimmi kapisisoqartoq

Pinngitsaaliinermut suliaq politiinut sulianut arlalinnut ilaavoq.

Politiit savimmik Saqqami kapisisoqarsinaneranik aamma nalunaarfigineqarput.

Angut 59-inik ukiulik angummit 57-inik ukiulimmit naamigut kapineqarsimavoq, kapineqartulli inuunera qujanartumik navianartorsiunngilaq.

Politiit nalunaaqutaq 14:53 nalunaarfigineqaramik Saqqamut aallartitsipallapput.

- Suliap isumaginera, killisiuinerit inatsisilerituumullu saqqummiussineq ingerlaannarluta suliaraagut. Angut sassartinneqassanngitsoq suliarlu persuttaasoqarsimasutut misissuiffigineqassasoq tassani paasivarput, politiit pigaartuisa pisortaat Poul Kreutzmann oqarpoq.

Imigassartortoqarsimaneranut attuumassutillit

Aamma suliat imigassartonermut attuumassuteqartut sapaatit akunnerata naanerani amerlapput.

Pisut imigassartortoqarsimaneranut attuumassuteqartut 70-init amerlanerusut tallimanngornermi ualikkut nalunaaqutaq sisamanit sapaatiummat ulloqeqqata tungaanut nalunaarsorneqarput.

Politiit naapertorlugit, angerlarsimaffinni eqqissiviilliornerit 32-t nalunaarutigineqarput. Angerlarsimaffinni eqqissiviilliorfiusuni arfineq-pingasut meerartaqarput.

Aamma imminut toqunnissamik sioorasaarutinut, aqqusinerni perulluliornernut, sioorasaarinernut allanullu suliat arlaqarput.

- Julefrokostit soorunami pissutaaqataasupilussuupput, kisianni aamma imigassartortoqarsimaneranut nalinginnaasumik ulapputigisartakkagut maani pineqarput, politiit pigaartuisa pisortaat Poul Kreutzmann oqarpoq.