Saviminissamik ujarlilerput
Aatsitassarsiorfiutileqatigiit nuna 1500 kvadratkilometerinik annertutigisoq ujaasiffigilerunikku seqernup kaaviinnarnera iluatsillugu ulloq unnuarlu qillerilerpata saviminissamik ujaasineq ukiut aappassaanik ingerlanneqassaaq.
Red Rock Resources pappilissanik nalilinnik niuertut aviisiisa ilaanut taama nalunaaruteqarpoq.
Sulisut 35-t, qillerussuillu diamantitallit marluk atorlugit qillerisoqassaaq, qillerutillu qulimiguullit atorlugit qilleriffissanut assigiinngitsunut nussorneqartassapput, erngullu oktobarimi qerinissaata tungaanut qillerisoqarnerani qaarsumerngit pissarsiarineqartut misissoqqitassat 5-6000 meterit anguniarneqassallutik.
Tassa Qimusseriarsuarmi nunarujussuaq ujaasiffiusuni qanoq saviminissaqartiginersoq ukioq manna qillerineq naammassippat paasinarsinissaa neriuutigineqarpoq.
Sulisussani siuttuusussat Islandimi massakkorpiaq pikkorissarneqaleruttorput, tassani isumannaallissaanissamut tunngassutilinnik sungiusarneqarput, soorlu sermimi annaassiniarnermik, issittumi uumasut, kiisalu inuisattumi sukumiisumik katsorsaariaatsinik sungiusarneqarlutik. Red Rock Resources taama nalunaaruteqarpoq.