VIDEO Saviminissamik piiaavissap piviusunngorsinnaanissaa aningaaseriviup pisortaata upperinngilaa
- London Miningip Nuup Kangerluani pilersaarutiminik aallartitsisinnaanissaa ilimananngilaq. Aamma qularnanngitsumik pilersaarutertik tuniniarsarissavaat. Tamanna takorloorsinnaavara.
- Aamma taava qularnanngitsumik aningaasaliisumit allamit pilersaarut ingerlanniarneqassaaq, saviminissamilli piiaalernissap piffissami qanittumi ungasiarnerusumiluunniit pinissaa ilimanarpallaanngilaq, Aningaaseriviup pisortaa Martin Kviesgaard oqarpoq.
Aamma atuaruk London Mining akilersuiunnaarpoq
Taassuma arlaleriarluni oqaatigisareerpaa, Nunatsinni aningaasarsiorneq aatsitassarsiornermit isaatitsinissamik pisariaqartitsiffiusoq. London Miningilli karsimut iluaqusiinissaa ilimanarpallaanngilaq.
Isukasiani pilersaarut piviusunngunngitsoorpat tamanna pilersaarutinut allanut qanoq sunniuteqassanersoq aningaaseriviup pisortaata eqqoriarsinnaannginnerarpaa.
- Aatsitassarsiorneq ilungersunartorsiorfiusoq tamatuma takutippaa. Tamanna nunarsuarmut tamarmut atuuppoq, tamanna Kalaallit Nunaannut immikkut tunngassuteqanngilaq. Tamatuma takutippaa, Kalaallit Nunaat aatsitassarsiornermik ingerlatsisunut pilerinartuusariaqartoq, taamami pisoqanngippat aatsitassarsiornermik aallartitsiniartut aallartinnavianngillat, soorlumi pineqartumi takoreeripput.