Savilersorneq, aallaasersornerlu imigassartorlutillu biilertut

Tamakkuupput Nuummi sapaatip akunnerata naanerani politiit ulapputigisaat. Arnaq 47-inik ukiulik Nuummi politinit tigusarineqarpoq angut inooqatigisani 54-inik ukiulik savimmik kapimmagu. Savimmik kapisineq pivoq tallimanngornerup unnuaani Nuummi Nuussuarmi.
Allattoq Jaaku Lyberth
maajip 04-at 2009 16:58

Angut talimigut savimmik kapitippoq Nuummilu napparsimavissuarmi Dronning Ingridip napparsimavissuani passunneqarluni.

Angut 40-nik ukiulik arfininngormat Nuummi politiinit tigusarineqarpoq arnaq inooqaqitigisani 27-nik ukiulik aallaammik qunusaarmagu annersarlugulu. Persuttaaneq aallaamillu qunusaarineq pivoq Nuummi Nuussuarmi.

Angut 40-nik ukiulik ippassaq sapaammi Nuummi eqqartuussivimi sassartinneqarpoq killisiorneqarlunilu. Nuummi politiit nalunaarput angut ulluni qulingiluani tigummigallagassanngortinneqartoq.

Sapaatip akunnerata naanerani Nuummi politiit ulappussimapput, aningaasarsisoqarsimanera maajillu allaaqqaataasiorsimaneq pissutigalugu. Imigassartorsimallutik biilinik ingerlatsisut arlaqartut nalunaarutigineqarput. Nuummi inissiat ilaanni blok 8-mi najugaqartut quiat parnaaqqasoq talimanngormat ammarneqarsimavoq, tassaniittullu karsit tallimat kalaallisuunik imaqartut tillinneqarlutik. Kikkut tillissimanersut tillitallu sumiinnersut maannamut politiinit paasineqanngitsoq Nuummi politiit nalunaarput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq