Savilersorluni ujajaasoqarnerata kingorna Brugseni nakkutilliisoqartitsilersoq
Nuummi Brugseneeqqamut sapaatit-akunnerata naanerani ujajaasoqarmat sulisut marluk savilersorfigineqarlutik ikilerneqarput. Ajoquserneri inuunerannik navianartorsiortitsinngillat, kingornali napparsimmavissuarmi suliaritittariaqarsimapput.
Brugsenip pisup kingorna sulisut tarnip pissusaanik ilisimasalimmit oqaloqateqarnissaannik neqeroorfigisimavai, pisorlu pillugu aamma immikkut oqaloqatigineqarsimapput. Brugsenimi nuna tamakkerlugu siulittaasoq, Ib Lennerth Olsen tusagassiorfinnut nalunaaruteqarluni taama allappoq.
Aamma atuaruk Ujajaasup pisiniarfimmi sulisut savilersorfigigai
- Siunnersuutigiuarparput sulisut taamatut iliortoqartarnerani nukersorluni akuliuteqqunagit, aammattaaq ilimagaarput piaarinaatsoornikkut uagut pisiniarfitsinnut ujajaasoqarsimasoq, nuna tamakkerlugu siulittaasoq aamma allappoq.
Brugsenili pisoq pillugu iliuuseqarluni sulisut pisiniartartullu toqqissimaqqullugit unnukkut nakkulliisoqarnissaanik aalajangersimavoq, tamannalu pisariaqartitsineq naapertorlugu pissaaq.
