Savat amii nunarpullu

Savalimmiuni savat amii ukiaq manna 50.000-it missaanniittut ikuallaavinnukaatiinnagassaajunnaarput. EU-p Savalimmiut immikkut akuerai ammit EU-mut ilaasortanut tuniniarneqarsinnaasut.

Savalimmiuni uumasut nakorsaat EU-lu ataatsimeeqatigeereerlutik isumaqatigiipput Savalimmiuni narsaatillit savaatillillu Europamut savat amiinik tuniniaasinnaalissasut, uumasulli nakorsaata Savalimmiuni savat nappaateqannginnerat uppernarsaqqaassavaa. Taassumalu saniatigut savat amii panertitaanngikkunik tarajortigaasariaqarput.

Nunatsinni Neqi A/S-ip ukiumut savat amii 20.000-it nunanut allanut tunisassiarisarpaat. Narsami savanik toqoraavik EU-mit akuerisaavoq, savanillu pilaasarnerni uumasut nakorsaat peqataatinneqartarlutik, taamaammat savat amii Nunatsinneersut ajornanngitsumik danmarkimut tuniniarneqarsinnaapput, siullermilli tarajorteqqaarneqartariaqartut, Neqip pisortaa Henning Sønderup oqarpoq.

Savat amii tarajortikkat tunisassiaralugit akikitsuarakasiupput, ameq ataaseq 18 koruuni sinnilaaginnarlugu naleqarmat.

Ukiut qulit matuma siorna savat amii tunisassiaralugit imminut akilersinnaasimavoq, maannakkulli imminut akilersinnaassusia killeqalernikuuvoq, Henning Sønderup naggasiivoq.