Kalaallit Nunaanni Politiit oqarnerat naapertorlugu suliaq misissuiffigineqarmat oqaaseqarpallaarsinnaanngillat.Assi: KNR / Malik Brøns

Savanik qaartartuliornissamik siorasaarisoq: Iliuuserisakka ugguaringaatsiarpakka

Narsami qaartartumeerinissamik quiasaarluni siorasaarisup politikerinullu innuttaasunut ataatsimiititsinermit peqataanngitsoortitsisup pisoq quiasaarneriinnaasoq oqarpoq.

- Immaqa imatut takorloorsinnaavara sava ilivitsoq uranimik neriseriarlugu taava qaartillugu.

Angut suleqatinilu Narsami januaarip ulluisa 27-anni nalunaaqutaq 12.30 ulloqeqqasioriartorput. Taakku Narsap Iluanut Kuannersuarnut isikkivilimmukarput.

Narsap iluanukariartornerminni isumassarsipput: Kuannersuit pillugit Facebookikkut quiasaarusiorta. Narsami innuttaasorpassuit Kuannersuarni aatsitassarsiortoqarsinnaanissaanik ilungersuussineranni quiasaaruteqarnissaq aamma inissaqartinneqassasoraat.

AAMMA ATUARUK Naalakkersuisut Kuannersuit pillugit qaartartumeerinissamik siorasaarinermik tigusaqartut

Kuannersuarnit urani savallu takorluulerpaat. Savanik qaartartuliaq.

- Biilinik ingerlarujoorniarluta Kuannersuit pillugit takorluukkakka qaffakaammata Facebookikkut liverluta filmeeraliorusulerpugunaasiit. Taava quiasaarluta aallartippugut. Immaqa oqaatigisagut mianersunngilagut. Uagut immaqa uaguunermik sianiginngitsoorlugit oqaasissagunaasiit aniapallareersimapput.

Angut savamik qaartartumeerinissamik siorasaaruteqartoq kinaassutsiminillu isertuusserusuttoq oqarpoq.

Angutip kinaanera KNR-ip ilisimavaa.

Politiit savanik qaartartulianik angerlarsimaffiani ujaasisut

Angut taanna suleqatinilu Kuannersuarnit uranimik atuillutik savanik qaartartuliornermik takorluuipput.

Qaartartumeerinissamik siorasaaruteqarneq naatsumik:

 

Naalakkersuisut qaartartumeerinissamik siorasaaruteqarneq tigusimallugu januaarip ulluisa 29-anni nalunaarutigaat. Taamaammat Kuannersuarni aatsitassarsiornissamik suliniut pillugu innuttaasunut ataatsimiititsinermi peqataaniarunnaarput.

 

Politimesterip, Bjørn Tegner Bayip oqarnera naapertorlugu ataatsimiinnermut ilungersunartumik siorasaaruteqartoqanngilaq. Sillimaniarnerlu qulakkeeqqasoq KNR-imut oqaatigaa. Innuttaasunullu ataatsimiinnernut peqataanngiinnarnissamut pissutissaqanngitsutut nalilerpaa.

 

Naalakkersuisut innuttaasuntu peqataaniannginnerat pissutigalugu suliffeqarfik suliniuteqartuusoq, Greenland Minerals oqartussaniillu inuit assigiinngitsut kisimik innuttaasunut ataatsimiititsinermut peqataapput.

 

Jens Frederik Nielsen: Innuttaasut pillugit innuttaasunut ataatsimiititsinermut peqataanngilagut

 

Naak politimesterip innutaasunik ataatsimiititsinermi sillimaniarneq qulakkeeqqaneraraluaraa Naalakkersuisut peqataannginnissartik aalajangiusimaannarpaat.

 

Aatsitassanut naalakkersuisuusimasup, Jens-Frederik Nielsenip (D) oqarnera naapertorlugu innuttaasut akornanni toqqissisimannginneq pissutaavoq.

 

- Siorasaarineq tunngavigalugu maanna nalilerparput toqqissisimannginnq Naalakkersuisunut politikkikkullu peqataasunut tunngasoq, Jens-Frederik Nielsen qaartartumeerisoqarnissaanik siorasaaruteqartoqarnerata kingunitsianngua oqarpoq.

 

Naalakkerusisut oqarnerat naapertorlugu siorasaarinerit piviusuunngillat.

Narsami innuttaasunik ataatsimiititsisoqarnerani savanik qaartartunik issiaviit ataannut ilisiniarlutik oqalupput.

Taanna inunnik atinillu aalajangersimasunik eqqaasaqarsimanatik oqarpoq.

Facebookkikkut videoliaq Naalakkersuisunit Kalaallit Nunaannilu Politiinit Nuummiit aamma takuneqarpoq.

Videomilli isiginnaartut videoliaq peeqquaat. Angullu taanna taamaaliorpoq. Politiinilli nalunaaqutaq ualikkut pingasunut aaneqarpoq.

- Narsarmiuusugut tamatta immitsinnut nalunnginnatta, Politeeq aallertoq qungujoriivilluni iserpoq oqarlunilu, filmeeraliat ajortumik tiguneqarpoq. Uanga tassani allaanngilanga tupassaagaq. Tassami tupannermik, angut oqarpoq.

Taanna politeeqarfiliaanneqarami immiussinermini qanoq oqarsimanini nassuiaatigaa.

Tamatumalu kingorna politiit angutip inigisaani misissuerusummata angerlarsimaffimmini misissuisoqarnissaanut akuersissummik atsiorpoq.

- Tassa imaassimavoq politiit illorput tamaat misissussagaat taanna savabombeq ujarlugu.

Politiilli savamik qaartartumik nassaanngillat. Angut tupaqqalaaraluarluni isumalluarsimalluni oqarpoq. Taassumami suna tamarmi quiasaarutaannaasoq nammineq nalunngilaa.

Innuttaasunut ataatsimiititsinermut peqataanngitsoq

Angut politiinit tigummigallarneqarpoq politeeqarfiullu isertitsiviani unnuilluni. Taanna aqaguani nalunaaqutaq ullup-qeqqanut aniguisinneqarpoq.

- Tusarpara aamma una filmeeraq Danmarkimut ingerlaqqissimasoq, tassa politiit paasiniaasartuinut anngussimasoq.

Angutip suleqataa immiussami Einsteinitut saqqummiunneqartoq Narsami politiinit aamma oqaloqatigineqarpoq.

Angutip kinaassutsiminik saqqummiusserusunngitsup ikinngutini Einsteinitut akoorutissanik sakkussiornermut immikkut ilisimasaqartutut saqqummiuppaa.

AAMMA ATUARUK Qaartartumeerinissamik siorasaarisoqaraluartoq ataatsimiititsinerit naalakkersuisup taamaatiinnanngikkai

- Ilumut Einstinitulli silatoorujussuunersoq aperitissimavoq, soorunami naaggaarsimavoq, angut illarluni oqarpoq.

Angut taanna Narsami innuttaasunut ataatsimiititsisoqarnissaanut peqataaniarluni eqqarsarsimagaluarpoq, tigusaareeramili angerlarsimaannaruni immaqa pitsaanerussasoq eqqarsarsimavoq.

- Kajumissuseqarsimanngilanga tupannangaarmat uannut pisimasoq taanna. Ajuusaarnermik takkutinngilanga, kisianni isiginnaarutikkut malinnaaginnarpunga.

Angutip Facebookkikkut videoliornerata kingorna ullut marluk qaangittut tassa januaarip ulluisa 29-anni, Naalakkersuisut qaartartumeerinissamik siorasaaruteqartoqarsimanera pissutigalugu Kuannersuarni aatsitassarsiortoqarsinnaanissaa pillugu innuttaasunut ataatsimiititsinermut peqataaniarnatik nalunaarput.

Kalaallit Nunaanni Politiit oqarnerat naapertorlugu suliaq misissuiffigineqarmat oqaaseqarpallaarsinnaanngillat.

Angut Narsami qaartartumeerinissamik siorasaaruteqarnera peqqutigalugu siorasaaruteqartutut unnerluutigineqartoq politiit KNR-imut uppernarsarpaat.

Angutip videoliaata peerneqarnikuunera pissutigalugu KNR-imit takusinnaanngilarput.

Isummersuutit