Savalimmiut qaammammi marsimi aatsaat taama kiatsigisimapput

Savalimmiuni ukiut qulingiluat matuma siornagut marsimi kiannerpaaffimmik rekordiliisoqarpoq, marsimili kiannerpaaffik taanna maanna qaangerneqarpoq.
Allattoq Lotte Holm
marsip 26-at 2009 13:28

Savalimmiormiut qarleeralersorlutik aneernissaat ilimanarpallaanngikkaluarpoq, taamaattorli Savalimmiuni sapaatip akunnerani kingullermi 16,1 gradinik kiammat qeqertani taakkunani marsimi aatsaat taamak kiatsigisoq, Danmarkimi silasiorfik DMI nalunaarpoq. Rekordi qaangerneqartoq 2000-imi marsip 17-anneersuuvoq, taamanikkut 13,3 gradinik kiattoq uuttorneqarmat.

Silasiortup Tim Peterssonip marsimi kiannerujussua maluginiarsimavaa.

Taassuma rekordiliinermut pissutaasutut nassuiaatigaa silaannaap kissartup Atlantikumit supoorinerata, qatsunganerata marsillu seqerngata suleqatigiinnerisigut sila taama kiatsigisimasoq. Nunatsinni marsimi kiannerpaatut uuttorneqarsimasoq 1975-imeersuuvoq, tassa taamanikkut Narsarsuarmi 16 gradinik kiattoq uuttorneqarsimagami.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq