Savalimmiut pillugit ataatsimiititaliaq suliaqarfiuvallaanngitsoq

Folketingimi Savalimmiut pillugit ataatsimiititaliami sulineq 2017-imi killeqarsimaqaaq. Ataatsimiititaliaq ukiup ataatsip ingerlanerani pingasoriaannarluni ataatsimiissimavoq. Aqutsisuili isumaqarput ataatsimiititaliaq suli pisariaqartinneqartoq.

Folketingimi Savalimmiut pillugit ataatsimiititaliap 2017-imut ukiumoortumik nalunaarusiaani allassimavoq:

"Nalunaarutissaqanngilaq".

Savalimmiunit folketingimut ilaasortaq Sjudur Skaale ataatsimiititaliami tassani 2015-miit siorna oktobarip tungaanut siulittaasuusimasoq isumaqarpoq, ukioq kingulleq pillugu nalunaarutissaqarpiarsimanngitsoq.

- Nutaarsiassaqanngippat ajunngilaq. Taama oqaatigerusuppara. Pisoqarpiarsimannginneranut peqqutaavoq Danmark Savalimmiuni oqartussaaffeqarpiarunnaarmat. Inatsisissatut siunnersuutit allannguutissallu taamaattumik killeqarsimaqaat.

AAMMA ATUARUK Inatsit saqitsaassutaasoq aalajangiiffigissagaa

Nakkutilliiffiunerusoq

Sjurdur Skaale naapertorlugu Savalimmiunut ataatsimiititaliaq ullumikkut nakkutilliiffiuneruvoq.

SAvalimmiut pillugit ataatsimiititaliaq 2017

Savalimmiut pillugit ataatsimiititaliaq 2017-imi pingasoriarluni ataatsimiippoq:

 

Ataatsimiinnerit marluk Savalimmiuni katittarneq pillugu inatsit oqaluuserineqarpoq, suiaqatigiit katissinnaanerat sammineqarluni.

 

Ataatsimiinnerit pingajuat Savalimmiuni meeravissiartaarnermut malittarisassat allanngortinneqarnerinut politikerillu 2018-imi septembarimi paasisassarsiorlutik angalanissaannut tunngasuteqarpoq.

 

Kalaallit Nunaannut tunngasunut ataatsimiititaliaq 2017-imi qulingiluariarluni ataatsimiippoq. Nunatsinni inatsisinik atuutitsineq pillugu tamanut ammasumik tusarniaaneq, immap assingi pillugit ammasumut isumasioqatigiinneq Pituffillu pillugu isumasioqatigiinneq matoqqasoq.

 

Kalaallit Nunaannut tunngasunut ataatsimiititaliaq inatsisissatut siunnersuutinut sisamanut isumaliutissiissutinik aamma tunniussivoq.

 

Najoqqutarisaq: Folketinget.dk

- Ministerinut apeqquteqarfiusinnaasumik Savalimmiunut tunngasut pillugit oqaaseqartartunut naapiffissaqartariaqarpoq, aammalu ukioq allortarlugu Savalimmiunukartarsinnaasunik. Ataatsimiititaliap ataavartumik paasissutissiineq oqaloqatigiinnerlu siunertarinerussagai, Skaale oqarpoq.

Siorna oktobariugaa ataatsimiititaliami siulittaasuuffik savalimmiuneersup allap Magni Argep tiguaa. Taassuma tikkuarpaa ataatsimiititaliap suliat annertuut Savalimmiunut Danamrkimullu tunngasut piaaraluni akuleruffiginaveersaarai, tamakkulu Lagtingimut naalakkersuisunullu isumagisassanngorlugit.

Savalimmiunut ataatsimiititaliami siulittaasup tullia DF-imeersoq Henrik Brodersen oqarpoq politikerit ataatsimiititaliamiittut uippakajaanngilluaasartut. Ataatsimiititaliarli Danmarki bloktilskudinik tunniussisartillugu suli pisariaqartinneqartoq, tapiissutit 2018-imi 641 millioniupput.

- Tunngaviusumik inatsisissap taasissutigineqarnissaa namminersulersinnaanerlu pillugu Lagtingip sunera qanittumik sapinngisatsinnik malinnaaffigaarput.

- Inatsisissat pillugit danskit savalimmiormiullu isumaqatigeeqissaartarput, tamakkuli soorunami inatsisissatut allatulli suliarineqartussaasut, DF-imeersoq oqarpoq.

Asserssuutitut taaneqarsinnaavoq Kalaallit Nunaat pillugu ataasimiititaliaq 2017-ip ingerlanerani qulingiluariarluni ataatsimiissimammat.

AAMMA ATUARUK Savalimmiormiut tunngaviusumik inatsisissaq 2018-imi taasissutigissagaat

AAMMA ATUARUK Nunatsinnit ilaasortanit taaseqataaffigineqarani akuerineqartoq

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat