Savalimmiuni illoqarfiit pingaarnersaat, Thorshavn.Assi: Begemot/Flickr Commons

Savalimmiut Nunatsinnit ingerlalluarneruvoq

Nunatta Savalimmiullu siuariartornissamut suliffissanullu tunngatillugu siunissaat assigiinngitsupilussuupput. Naalagaaffeqatigiinneq pillugu ukiumoortumik nassuiaammi, ministeriunerup Lars Løkke Rasmussenip saqqummiussaani, tamanna atuarneqarsinnaavoq.

Nassuiaat naapertorlugu, Savalimmiut aningaasaqarnerat ukiuni kingullerni pingasuni pitsaasumik inissisimavoq, tunisat ataatsimut nalingat ukiumut 6 procentit angullugit qaffakkiartorsimalluni. Aalisarnermit isertitat amerlanerunerat, taamatullu aamma innuttaasut atuinerunerat tamatumunnga pissutaanerpaavoq.

Nunatsinnili ukiuni kingullerni pingasuni, piffissaq tamaat isigalugu, tunisat ataatsimut nalingat 3 procentit sinnilaaginnarlugit qaffariaateqarpoq - 2012-imi amigartooruteqarluni inissisimaneq tunngavigalugu naatsorsugaalluni.

Aamma atuaruk Savalimmiormiut peqataanissamut aalajangiinissartik kinguartippaat

Innuttaasulli kiffartuunneqarnerat ullumikkutut inissisimaannassappat Savalimmiut Nunattalu tamarmik immikkut missingersuutiminni ukiumoortumik 750 millionit koruunit pisariaqartippaat. Nunat karsii sinneqartooruteqarfiussappata, nunani marluusuni aaqqissuusseqqinnerit pisariaqartut angisuut piviusunngortinnissaat suli amigaataasoq, nassuiaammi aamma tikkuarneqarpoq.

Savalimmiut suliffeqarnikkut aamma Nunatsinnut naleqqiullugit ingerlalluarnerupput. Savalimmiormiut qaffasinnerusumik ilinniagaqarnerat tamatumunnga pissutaavoq, aamma ilinniakkanut nunani allani piumaneqartunut tunngatillugu. Nunatsinni inuusuttut affaannaat ilinniagaqalersarput, tamannalu nunani tamalaani pissutsinut tunngatillugu aamma appasippallaartoq nassuiaammi oqaatigineqarpoq.

Aamma atuaruk Ministeri: Kalaallit Nunaannut immap assingi nutaat qaqugu piariissanersut nalunarallarpoq

Suliassaqarfiit arlariit ataatsimoorullugit ingerlanneqartut danskit naalakkersuisuinit tapersersorneqartut aamma eqqaaneqarput, soorlu upalungaarsimaniarneq pitsaanerusoq, ilisimatusarnikkut suliniutit aamma immap assinginik suliaqarnermut atatillugu uuttortaanerit, taakkuli Danmarkimi naalagaaffiup suliffiutaanik nussuisoqarnera pissutigalugu kinguaattoorfiupput. Aammattaaq Nunatta Savalimmiullu namminerisamik inatsisinik tunngaviusunik suliaqarnerat danskit naalakkersuisuisa tapersersorpaat - tamannali Inatsimmi tunngaviusumi killiliussat iluanni pissasoq oqaatigineqarluni.

Naalakkersuisut siulittaasuat Kim Kielsen, Savalimmiuni lagmandi Aksel V. Johannesen aamma danskit ministeriunerat Lars Løkke Rasmussen aqagu ataatsimiissapput. Tamanna naalagaaffeqatigiinneq pillugu ukiumoortumik ataatsimiinnermut atatillugu pissaaq, ataatsimiinnerlu tamatumuuna Nuummi ingerlanneqassalluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat