Savalimmiut Nunarpullu isumaqatigiissuteqarput
Nunarput Savalimmiullu aalisarneq pillugu nutaamik isumaqatigiittoqarpoq aammali aalisarnerinnaanngitsoq pillugu suleqatigiissutaasinnaasunik allanik isumaqatigiittoqarpoq.
Aalisarnermi pisassat pillugit Savalimmiuni Aalisarnermut imarsiornermullu tunngasunut naalakkersuisoq Bjørn Kalsø nunatsinniillu Aalisarnermut piniarnermullu naalakkersuisoq Rasmus Frederiksen aamma isumaqatigiissuteqarput, aalisakkalli suut pisassallu annertussusissaat nunatsinni naalakkersuisut sinneri akuersaariarpata aatsaat avammut kalerriunneqassasoq aalisarnermut naalakkersuisoq Rasmus Frederiksen radioaviisimut oqarpoq.
Savalimmiut Kalaallillu Nunaata teknikkikkut suleqatigisinnaanermik isumaqatigiissuteqarsinnaanissaat anguniarneqarpoq. Kilisaataateqarnermi aalisariuteqarnermiluunniit atortorissaarutitigut misilittakkat aallavigalugit ineriartortitseqatigiissinnaaneq misissorneqassaaq.
Nunarput Islandi Savalimmiullu suluppaakkanut ikerinnarsiortunut nutaamik ingerlatseriaaseqalernissami siunniussat aamma naalakkersuisut sinnerinut ilisimatitsisutigineqareerpat aamma aatsaat qanoq ingerlatseriaaseqarnissaq avammut kalerriunneqarumaarpoq.
Savalimiut Canadallu aalisarfimmi Flemmish Cappimi raajarniarneq pillugu assortuunnerat aamma qaangerniarneqassasoq, Savalimmiuni aalisarnermut naalakkersuisup neriorsuutigisimavaa, taamaalilluni Canadap nunatta Savalimmiullu suleqatigiinnerat ingerlaqqinniassammat.
