Savalimmiut niisarnarnialeruttorput
Savalimmiuni niisarnamasoqaleruttorpoq, maannamut 150-it pisarineqarsimalerlutik.
Niisarnarniartarneq assortuussutaasaqisoq aallartilluareerpoq, niisarnat 150-it qeqertanut ulluni kingullerni qulini qanillattorsimasut nusullugit pisarineqarsimalerput.
Niisarnat nerilluartagaat, tassalu amikut nunamut ukiup taamaalinerani qanillisarput, niisarnallu aasaanerani piniagaanerusarnerannut peqqutaapput.
Kattuffiit nunanit allaneersut savalimmiormiut niisarnarniartarnerannut sakkortuumik isornartorsiuisarsimapput.
Isornartorsiuisarnerit kingunerisaannik niisarnanik toqutseriaatsit allanngortinneqarsimapput. Assersuutigalugu niisarnarniat siuttuat ileqqoq malillugu naaleqqaartuusarsimagaluarpoq, maannali niisarnat qungasiisigut kapillugit toqunneqartarput.
Niisarnat 800.000-it missaanniissanngatinneqarput, taamaattumik savalimmiormiut pisarisartagaat amerlassutsimut akornutaasutut isigineqanngillat.
