Savalimmiut namminersulernissamut alloriaqqinniarput
Savalimmiuni naalakkersuisut nutaat namminersulernissamut suliniutit ingerlateqqilerniarpaat aamma akisussaaffiit Danmarkimit tigoorarneqartut amerliartornerannut atatillugu Danmarkimiit ataatsimoortumik tapiissutit ikiliartuaartinneqassapput.
Allattoq Elisa Isaksen
februaarip 03-at 2008 13:18
Taama nalunaarput Savalimmiuni naalakkersuisut nutaat, Socialdemokratiusumik Joannes Eidesgaardimik siulittaasullit, naalakkersuisoqatigalugit Republikanerit aamma partii mikisoq Centerpartiet.
Naalakkersuisunngortut oqaatigaat, Danmarkimiit Savalimmiunut ataatsimoortumik tapiissutit maanna ukiumut 615 miliuunit koruuniusut ukiuni tulliuttuni 160 miliuunit koruuninik ikilisinneqassasut.
Peqatigitillugu Savalimmiuni innuttaasut 2010-mi Savalimmiut tunngaviusumik inatsisissaat taasissutigissavaat.
Savalimmiuni naalakkersuisunngorlaat Inatsisartunit 33-nik ilaasortaqartunit 17-inik tunuliaqutaqarlutik amerlanerussuteqqaqqalaaginnarput. Joannes Eidesgaardip kikkut naalakkersuisunut ilaasortanngornersut aatsaat aqagu nalunaarutiginiarpaa.
