Savalimmiut namminersornerulerumallutik naalagaaffeqatigiinnerup ilusaata qanganitsersimasup nutarternissaa kissaatigigaat
Naalagaaffeqatigiit ajalusooriaannaapput.
Savalimmiuni partiip Sambansflokkurinip - ataqatigiinnissamik pingaartitsisup - siulittaasua Bárður á Steig Nielsen, Naalagaaffeqatigiit pillugit Folketingimi ataatsimiittoqarnerani taama oqarpoq.
Naalagaaffeqatigiinnerup ilusaa qanganisanngorsimasoq partii isumaqarpoq. Qanoq iliuuseqaqataanerusinnaanissartik Sambandsflokkurinip kissaatigaa:
- Naalagaaffeqatigiit allanngortinneqarnissaat piffissami sivitsortumi kissaatigaarput, iliuuseqartoqanngippammi, akisussaaffinnillu nutaanik tigusinngikkutta Naalagaaffeqatigiinneq ajalusooriaannaavoq, siulittaasoq oqarpoq.
Namminersorneruneq pillugu inatsisip 1948-meersup Namminersornermut inatsimmut allanngortinneqarnissaa partiip siunnersuutigaa. Nunanullu allanut tunngasuni Danmarkip piginnaatitsissummik tigumminninnerata atorunnaarsinnissaa partiip taassuma saniatigut kissaatigaa.
Tassa Savalimmiormiut nunanut allanut tunngasuni politikki nammineq aqussinnaalissavaat, Danmarkillu oqartussaaffiginngisaanik nunanut allanut niueqatigiinnissamik isumaqatigiissusiorsinnaaneq nammineq akisussaaffigilerusuppaat.
Savalimmiut kunngeqarfiup iluani namminersortutut inissisimalerusuppoq, nunanut allanut tunngasunut politikkikkut sinaakkusiortoqarlunilu namminiilivissinnaanissarlu pillugu aamma sinaakkusiortoqarluni.
Savalimmiut nunat tamalaat niueqatigiinnikkut suliniaqatigiiffiannut WTO-mut sinniisuutitaqalersinnaanissaat sulissutigineqaleruttorpoq.
Naalagaaffeqatigiit ukiumoortumik siorna aggustimi ataasimiimmata tamanna paasinarsivoq.
