Savalimmiut Kalaallit Nunaallu suleqatigiinnialerput
Taama erseqqissumik naqissusiipput, Naalakkersuisut siulitaasuat, Kuupik Kleist, Savalimmiunilu nunami namminermi avatangiisinullu naalakkersuisoq, Annika Olsen, Nunat Avannarliit illuutaanni ippassaq ataatsimeeqatigiinnerminni.
EU-mut ilaasortaanini pissutigalugu Danmark isumaqatigiissuteqassaaq, uagullu nammineeerluta Danmarki avaqqullugu suliniuteqarluta, Kuupik Kleist oqarpoq.
Kalaallit Nunaat Savalimmiullu EU-mut ilaasortaannginnertik pissutigalugu EU-imi nunat CO2-mik annikillisaarniarnerat assigalugu Savalimmiut Kalaallit Nunaallu annikillisaanianngillat, Annika Olsen oqarpoq.
Silap pissusaa pillugu ministeriusimasumit, Connie Hedegaardimit, savalimmiormiut nersualaarneqarsimasut, Annika Olsen oqarpoq. Savalimmiormiut anguniagaat piviusorsiorput pimoorussinerullutillu, Connie Hedegaard issuarneqarpoq.
Kalaallit Nunaata CO2-imik annikillisaaniarnerata pimoorussinnginnertut danskinit oqaatiginiarneqarnera Kuupik Kleistimit ilumuunnginnerarneqarpoq, nunarsuarmi tamarmi pisut aallaavigalugit iliuuseqartoqartoq oqarluni.
Kalaallit Nunaani alumiiniuliorfissap, erngup nukinganik nukissiuuteqarluni ingerlanneqarsinnaasup, nunarsuarmi allami alumiiniuliorfik aamarsuarnik nukissiuuteqartoq taarsersinnaavaa, Kuupik Kleist oqarpoq.
