Savalimmiut EU-mit killilersuiffigineqassanersut ullumi aalajangiiffigineqassaaq

Ammassassuarnik pisassiissutit pillugit sivitsortumik assortuuttoqarnera, savalimmiuni aalisarnermut naalakkersuisoq Jacob Vestergaard naapertorlugu, Savalimmiut nunanut EU-mut ilaasortaasunut ammassassuarnik tuniseqqusaajunnarneranik peqatigisaanillu umiarsuit savalimmiuneersut EU-mi umiarsualivinnik atueqqusaajunnaarnerinik kinguneqarnissaa ilimaateqartupilussuuvoq.

Taamatullu pisoqassappat Savalimmiunut annertuumik kingulerlutsitsissaaq, aalisarnermut naalakkersuisoq oqarpoq.

- Nunat EU-mut ilaasortaasut aalisakkanik avammut nioqqutigisatta ilarpassuinik pisisartuupput. Taamaammat nioqqutigisatsinnut niuerfinnik allanik nassaarniarnissaq unamminartupilussuussaaq, Jakob Vestergaard oqarpoq, EU-llu aalisapiluttoqarneranik ammassassuaqassutsimillu piujuaannartitsinissamik tunngaveqarluni aqutsisoqannginneranik pisuutitsinera ilumuunnginnerarlugu.

Pisassiissutit agguataarneqarnissaannut EU-p aaqqiissutissamik nassaarusussimannginnera pakatsinarnerarpaa.  Savalimmiut ammassassuarnik pisassiissutinik 85.000 tonsiusunik 150.000 tonsinut 2010-mi qaffaavoq.

- Aalisarneq inuussutissarsiutigaarput. Aalisakkat imartatsinniittut aalisartariaqarpagut, Jacob Vestergaard erseqqissaalluni oqarpoq.

Aamma Islandip ammassassuarnik pisassiissutit assortuussutaanerisa kingunerisaanik EU-mit pillagaanissaa ilimagineqarpoq.