Savalimmiut: Coronamik Brasiliami allanngortumik Savalimmiuni ataaseq tunillatsissimasoq
Naqqiut: Inuit 652-it Savalimmiuni maanna tunillanneqarsimasut siusinnerusukkut allaaseraarput. Tamanna paatsoorneqarsinnaavoq, coronavirusimmi tuniluutilernerata kingorna katillugit 652-it tunillanneqarsimammata. Kukkuneq KNR-imit ajuusaarutigaarput.
Coronamik Brasiliami allanngortumik aatsaat siullermeertumik Savalimmiuni uppernarsaasoqarpoq.
Taanna sapaatip akunnerata siuliani uppernarsarneqarpoq.
- Savalimmiuni oqartussat Savalimmiunit Savalimmiunullu pisariaqanngitsumik angalasoqaqqusinngillat.
- Savalimmiunut angalasut tamarmik aallarnissaminnut tunillatsissimannginnermut uppernarsaammik annerpaamik ullunik pingasunik pisoqaassusilimmik peqassapput. Tamatuma saniatigut tikittut tamarmik tikinnerminni misissorteqqissapput. Taamaallaat meeqqat aqqaneq marluk inorlugit ukiullit minillugit.
- Angalasut tikinnerminnit misissortinnermi akissutersinissaata tungaanut angerlarsimaannarnissaat innersuussutaavoq.
- Misissortinnerup inernera nalinginnaasumik unnuk taanna kingusinnerpaamillu aqaguani ullup-qeqqanut akissutersineqartarpoq.
- Tamatuma saniatigut angalasut tamarmik tikinnerannit ullut arfinillit qaangiunneranni misissorteqqinnissaat innersuussutaavoq.
Paasissutissarsiffik: Nunanut allanut tunngasunut ministereqarfik
Tunillatsissimasoq savalimmiormiuuvoq Brasiliamiissimasoq. Taanna Savalimmiunut tikinnerminit ullut pingajussaani misissorteqqikkami tunillatsissimasoq paasineqarpoq, Savalimmiuni nakorsaaneq, Lars Fodgaard Møller Kringvarp Føroyamut paasissutissiivoq.
- Takusinnaasarput malillugu taanna Europami siornatigut takuneqarsimanngilaq. Tunillaassuunnaveersaagaavorli, tunillatsissimasorlu allanut tunillaasimanngilaq, Lars Fodgaard Møller oqarpoq.
Savalimmiuni nakorsaanerup oqarnera naapertorlugu Brasiliamit allanngortoq Tuluit Nunaanni Afrikallu kujataani allanngortumisulli tunillaassuutiatiginngilaq.
Tuluit Nunaanni coronavirus allanngortoq B117-imik taajuuteqartoq Danmarkimi tuniluuppoq. Taanna coronavirusimit nunarsuaq tamakkerlugu tunillaassuuttoqalerneranit nunatsinnillu eqqunneqarsimasumit ilisimaneqartumit tunillaassuutianeruvoq.
Tuluit Nunaanni allanngortoq Danmarkimi matoqqasoqarneranut nunatsinnullu februaari ilanngullugu angalasoqaqqusaannginneranut ilaatigut pissutaavoq.
Johns Hopkins Universitymit kisitsisit naapertorlugit Savalimmiuni tunillatsissimasullutik maanna napparsimasut arfineq-marluupput, coronavirusilu siorna tuniluutilermalli tunillatsissimasut katillguit 652-iupput. Ataasiinnarlu toqusimalluni.
