Savalimmiut Avannaamioqatigiinnut ilanngunniarpoq
Nunat Avannarliit siunnersuisoqatigiivinut savalimmiormiut ilaasortannguikkusupput.
Siunnersuisoqatigiit oktobari naalerpat Oslomi naapissapput. Ataatsimiinnermi ilaatigut eqqartorneqartussat tassaapput avannaamioqatigiit suleqatigiiffiata iluani Kalaallit Nunaata Savalimmiullu namminersulernissaannut atatillugu killiffiusut.
Avannaamioqatigiit ministeriisa suleqatigiissut septembarimi akuersissutigaat, namminersulernissamut tunngasut nunat avannaamioqatigiit suleqatigiiffiata sunniuteqarfiginerussariaqarai. Helsingforsimili isumaqatigiissutip allanngortinniarnera akerlerineqarpoq – avannaamioqatigiit taanna tunngaviusumik inatsisaattut isigineqartarpoq.
Savalimmiut Nunat Avannaamioqatgiit Siunnersuisoqatigiiffianut ilaasortanngortinneqavissappata taanna allanngortittariaqassaaq.
Qallunaat, savalimmiormiut kalaallillu Nunat avannarliit siunnersuisoqatigiivini ilaasortatut, ministerit suleqatigiinnerisa inernerat nuannaarutigaat, naammaginaguli Nunat Avannarliit suleqatigiiffiata Savalimmiormiut ilaasortanngorsinnaanerannik qinnuteqaataata tunngaviatigut isumaqatiginngimmassuk.
Isumaqarpummi, Helsingforsimi isumaqatigiissut tamaat allanngortinngikkaluarlugu Savalimmiut ilaanissaat politikkikkut piumassuseqarfigineqartariaqartoq.
