Savalimmiut aningaasaliinikinnerpaapput
Ilisimatusarnermut aningaasat qanoq amerlatigut atorneqartarnersut Sverigimi, Islandimi, Danmarkimi Savalimmiunilu misissuiffigineqarsimavoq, Savalimmiullu aningaasalinikinnerpaasut paasineqarpoq. Sverige aningaasaliinerpaasarpoq, tassa naalagaaffimmi tunisat ataatsimut nalinginit 4 procent aningaasaliissutigisarpaat, Islandip 3 procenti taavalu Danmarkip 2,6 procent. Savalimmiut appasinnerpaapput, tassa naalagaaffimmi tunisat ataatsimut nalinginit taamaallat 0,8 procentimik taakku aningaasaliisaramik.
Ilisimatusarneq pillugu Savalimmiuni siunnersuisoqatigiit misissuisuusimapput, taakkulu isumaqarput ilisimatusarneq pillugu savalimmiormiut soqutiginnippallaanngikkaluartut, inuussutissarsiornikkut inuunermi nutaamik pilersitsiniarneq annikillinngitsoq. Savalimmiormiut namminneq ilisimatusartuunngillat. Savalimmiunili suliffeqarfissuit teknologimut tunngasunik pisiniartarput imaluunniit nunani allani iliuutsinik ilaarsisarlutik. Taamaammat suliffeqarfiit suli nutaanik pilersitsiuassapput.
