Savalimmiut aallartitaqarfittaarusupput

Savalimmiormiut Islandimi namminersortumik aallartitaqarfeqalernissartik anguniarpaat. Illersuutimittut ilisarnaatertik erfalasortillu kisiisa ilisarnaatiginiarlugit savalimmiormiut tassani anguniarpaat.

Taamaammat Folketingimi ilaasortap, Atlantikullu Avannaani suleqatigiinni ilaasortap, Høgni Hoydahlip, nunanut allanut ministerimut, Per Stig Møllerimut, apeqquteqaatigaa, savalimmiormiut immikkut ittumik aallartitaqarfeqalersimanersut.

Savalimmiormiut namminerisamik aallartitaqarfeqalernissaat siornatigut akuersissutigineqarsimanngilaq, Savalimmiut danskit naalagaaffiannut ilaammat.

Danskilli aallartitaqarfiat Islandimiittoq savalimmiormiumik atorfinitsitseqqammerpoq, savalimmiormiut aallartitassaannik.

Savalimmiut naalakkersuisuittaaq Islandimi allaffinnik pilersitsipput, Savalimmiumiut sinniisoqarfiannik maannamut taaguuserneqartumik.

Savalimmiut Islandillu akornanni niueqatigiinnermik isumaqatigiissuteqartoqarpoq.

Nunanut allanut ministerip allakkatigut akissutissaata takkunissaa sapaatip akunnerata tulliata ingerlanerani ilimagineqarpoq.