Savalimmiut aalisarnikkut ingerlalluaqqilerput
Timmissat nualluussuata kikkunnit tamanit ernumassutaanera, Savalimmiuni aalisakkanik tukertitsisartunut iluaqutaalerpoq.
Aalisakkanik tunisassiorneq ukiuni kingullerni arlaqartuni assut ajornartorsiorfiusimasoq, aningaaseriviit ikiorsiullugit annaqqavittarsimasoq ilorraap tungaanut saatinneqarsimalerpoq.
Savalimmiuni aalisakkanik tukertitsineq aalisakkat nappaalanerannit avammullu tunisassiat akilutsitaanerannit ilungersortinneqarsimaqisoq ingerlalluaqqilerpoq.
Kapisillit kiilumut akii qaffarujussuarput, 15 koruuniniit 40 koruunit missaannut qaffakkamik. Tamannalu timmissat nappaataata tusaamaneqarnerlunneranik ilaatigut pissuteqartinneqarpoq.
Aalisakkat nappaataat akiuussutissaqartinneqalereersoq Savalimiuni ajornartorsiutaajunnaarsimavoq, taamaalillunilu kapisillit isitooqqat nappaateqanngitsut siorna 5,4 millionit immamut avalatsinneqarsimapput, ukiormanna 9 millionit avalatsinneqarlutik.
