Savalimmiunut nooqqammisut qinersisinnaatitaasut
Danskisut innuttaassusillit nunatsinnut suliartorlutik nuuttut qinersisinnaatitaanerat killilerneqassasoq Siumut isumaqarpoq.
Siumut naapertorlugu nunatsinnut nuuttut inuiaqatigiinnut sunniuteqarpallaartarput.
Taamalu Siumup tikisitanut piumasaatit sakkortusiniarpai. Naalagaaffeqatigiinnili taama piumasaqaateqartoqanngilaq.
Nunatsinni danskisut innuttaassuseqartut ukiup affaani nunatsinneeqqaarlutik qinersisinnaatitaalertarput. Danskisullu innuttaassusillit naalagaaffeqatigiinni sumiikkaluarunilluunniit Folketingimut qinersisinnaapput.
Aamma danskisut innuttaassuseqartut tamarmik Savalimmiuni najugaqartutut nalunaarsorneqalerunik lagtingimut qinersisinnaatitaasut nittartakkap Sermitsiaq.ag-p allaaseraa. Savalimmiut Københavnimi sinniisoqarfiat Sermitsiaq.ag-mut paasissutissiivoq.
Kukkusumik paasissutissiisoqartoq
Inatsisartunmi Siumup gruppiani siulittaasoq aamma aningaasaqarnermut akileraartarnermullu ataatsimiititaliap siulittaasua Jens Immanuelsen KNR-imut sisamanngormat oqarpoq, maanga nunasisut tamat oqartussaanerinut pisinnaatitaaffiinik killiliineq naammaginartuusoralugu, aamma kalaaliusut Danmarkimut nuukkaanni Folketingimut taasisinnaasoqanngimmat.
Paasissutissarli tamanna eqqunngilaq, kalaallit danskisut innuttaassuseqartarmata, taamaattumik folketingimut qinersisinnaatitaallutik - naalagaaffeqatigiittoqarmat.
AAMMA ATUARUK Siunnersuut eqqunngitsumik tunngavilersorneqartoq
Tamanna pillugu KNR-ip Jens Immanuelsen ilisimatippaa Jens Imanuelsenilli tamanna oqaaseqarfigerusussimanngilaa.
Siumup siunnersuutaa Inatsisartunit novembarip ulluisa qulingiluaani oqallisigineqassaaq.
Aamma Siumup qinersiviit amerlanerulersinneqarnissaat pillugu oqallinnissamut siunnersuutaa tassani oqallisigineqassaaq.
AAMMA ATUARUK IA tikisitat qinersisinnaatitaanerannik killileerusunngitsoq