Savalimmiuni uuliasiortunut Greenpeace qanoq iliuuseqalersaarpoq
Tallimanngormat Greenpeace-p umiarsuaa Esperanza, London-imiit Savalimmiut tungaanut aallarpoq. Mexico-p Kangerliumanersuani uuliamik maqisoornerup kingorna Greenpeace qanoq iliuuseqalersaalerpoq, Greenpeace-p nittartagaanni taama allassimavoq.
Qanoq iliuuseqalersaarneq taaaneqarsimavoq "go beyond oil-ship tour"-imik, kalaallisuunngorlugu ima paasineqarsinnaalluni: uuliamik ikummateqarneq qimatsinniarlugu angalaneq. Ima aamma nittartakkami allassimasoqarpoq, "uuliasiorfiornermik suliffissuaqarfiit soqutigittaaqalutik uuliamik ujaasinertik kiinarsisariaqarpaat".
Sunarpiaq anguniarneqarnersoq Danmarkimi Greenpeace-p generalsekretæriata, Mads Flarup Christensen-ip annertunerusumik nassuiarnianngilaa, dr.dk allappoq.
Qilleriviit arlallit qillerisinnaajunnaartinneqarnissaat Savalimmiormiut aarleqqutigaat. Savalimmuit Skotland-illu akornanniittoq qillerut West Phoenix umiarsuup Esperanza-p ornikkaa, savalimmiormiut nittartagaata ilaata, Portal-ip allaaseraa.
Nittartakkatigut nutaarsiassaqartitsiviit arlallit allapput, politiit immikkut sungiusakkat aamma sakkutuut imarsiortut, ipassaq unnukkaa Savalimmiuliarlutik aallareersut. Danskit politiivisa pisoq oqaaseqarfigerusunngikkaat, Savalimmiuni politiit nalunaarput ikioqqullutik nalunaarsimallutik, taama tusagassiutinut nalunaarummi politiit allapput.