Savalimmiuni uuliasiortoqaqqilerpoq
Savalimmiut imartaani juulip naalernerani uuliasiortut arlallit uuliasiorlutik qillerilissapput.
Norgemiut uuliasiortartut Statoil, pingaarnertut ingerlatsisuussaaq kisiannili aamma Danskit suliffeqarfiat DONG qillerinissami peqataassaaq. Qaarsukkut basaltikkut issulluinnartukkut qillerisoqassaaq, tamannalu uuliasiortut misilittagaqarfigerpianngilaat, ilimagineqarporlumi qillerinermut aningaasartuutit amerlanissaat, taamaakkaluartorli uuliamik nassaarnissaq isumalluarfigineqarpoq.
Siusinnerusukkut Savalimmiormiut pisortaqarfiinit uuliaasiorfeqatigiit qillerinissamut akueritittarsimapput qilleriffiilli iluatsiffiuneq ajormata Savalimmiut qeqertaasa qanittuini qillerinissaq misilinnialerpaat.
Uuliasiorneq pillugu Savalimmiuni ataatsimeersuarnermi qanittukkut pisumi Gareth Allinson, Statoil-ip uuliasiornermi Europami misissuinermut pisortaa, oqarpoq aasaanerani Savalimmiuni uuliasornermi nassaarnissaq sisamararterummik ilimanaateqartoq.
