Savalimmiuni uuliasiorput
Savalimmiut nunaata ataani uuliamik nassaarsiorneq soqutigineqaqqilerpoq. Italiamiut uuliasiortut ENI-mik taaguutillit, siornatigut Savalimmiuni uuliasiorsimagaluartut kingumut uuliasioqqinnialersaalerput.
Nutaarsiassaqartitsivik Ritzau naapertorlugu, Savalimmiuni Inuussutissarsiornermi naalakkersuisup Bjarne Djurholmip Italiamiut ENI-kkut Savalimmiuni uuliasiornissaasa sivitsorneqarnissaat akuersissutigisimavaa.
Tassalu imaattussanngorpoq, ukiuni qaninnerpaani tulliuttuni savalimmiut nunataata ataanut uuliasiornerit nutaat pingasut pisussanngortut.
Manna tikillugu Savalimmiuni iluatsinngitsumik uuliasiortartut Statoil aammalu BP kiisalu maannakkut aammaarlutik uuliasiulersaartut Italiamiut ENI-kkut sisamariarlutik uuliasiortareeraluarput.
Sisamassaanik qillerisoqarmat uuliasioqatigiit kattuffiat Amerada Hess siuttoralugu tamanna pivoq. Misissuinerlu taanna uuliamik nassaarfiugaluarpoq, ukiulli arlallit ingerlaqqaartussaapput uulia nassaarineqartoq ilumut atorneqarsinnaanersoq ilumullu piiagassatut naammannersoq paasilluarneqarnissaata tungaanut.
