Savalimmiuni uulia akitsorujussuassaaq
Nunatsinni aalisartut raajat akii pillugit tamaviaaruteqaqqammertut kisimik taama atugaqanngillat, aammali Savalimmiuni aalisartut atugarissaarpallaannginnerat nutaarsiassaqartitsiviup ritzaup allaaseraa.
Savalimmiuni aalisartut angallataat siunissami talittarfinni talinngasariaqassapput uuliap akia qaffasingaarmat angalagaluarunik imminut akilersinnaanavianngimmat, taama naliliivoq Savalimmiuni umiarsuuaatillit peqatigiiffiani siulittaasoq Jákup Sólstein.
Taanna uparuaavoq, Savalimmiuni politikerit tamatumunnga ikiuunnianngissut.
Erseqqissaatigaalu kilisaatit Barentip imartaani kilisattut aammattaaq kilisaatit Savalimmiut eqqaani aalisartut eqqugaanerpaajussasut.
Aalisariutaatillit arlallit sipaaruteqarumallutik ikioqatigiilersimasut oqaatigineqarpoq, ilaatigut angallatitik uuliatunnginneruniassammata oqilisarniarlugit suliareqqinneqartitertut oqaatigineqarluni.
Savalimmiuni aalisariutaatillit siusinnerusukkulli aningaasaqarniarnermikkut ajornakusooruteqareersuupput. Ilimagineqarporlu pissutsit taamaaginnassappata Savalimmiuni kilisaatit ikileriarujussuarnissaat.
