Savalimmiuni tunngaviusumik inatsisissaq ukiuni qulini suliarineqarpoq

Pilersaarutit malillugit ingerlasoqassappat aappagu Savalimmiormiut namminneq tunngaviusumik inatsisissartik taasissutigissavaat.
Allattoq Elisa Isaksen
juulip 02-at 2009 17:21

Tunngaviusmik inatsisip imassai pillugit isumaqatigiissutiginissaa suli sulissutigineqarpoq, pingaarnertulli siunertaq politikkikkut isumaqatigissutigilluarneqarpoq, tassalu Savalimmiuni savalimmiormiut Danmarkiunngitsoq naalagaanissaannik naqissusiinissaq. Tunngaviusumik inatsit pillugu ataatsimiititaliami siulittaasoq Poul Michelsen taama oqarpoq.

- Savalimmiormiut maanna naalagaaffeqatigiinnerup iluanisulli ingerlaannassanerlutik imaluunniit tamatumannga anissanerlutik aalajangissavaat. Assigiinngissulli tassaassaaq tamanna Savalimmiormiut Danmarkimut qanoq ataatsimooqatigiissanerlutik aalajangissagamikku. Kalaallit maanna naalagaaffeqatigiittut inissisimanerat kingornalu namminiilivikkaluarpata suleqatigiilluta attaveqaannarnissarput kissaatigaarput, Poul Michelsen oqarpoq.

- Inatsisissaq akuersissutigineqarpat Danmarkip qanoq qisuariarnissaa apeqqutigineqarmat ima akivoq:

- Naluara, kisianni suliaq tamanna 1998-imili aamma suliarilerpaat, pappiaqqallu uppernarsaatit qallunaatut allaqqapput. Maannamut akerliusoqarneranik malugisaqanngilagut, inuilli taasitinneqareerpata arlaatigut qallunaat isumaqataallutik isumaqataanatilluunniit qisuariarnissaat naatsorsuutigaarput, kisianni Schlüter, Nyrup Fogh imaluunniit Lars Løkkep oqarnerat malillugu uagut tamanna aalajangissavarput, Poul Michelsen naggasiivoq.

Savalimmiuni tunngaviusumik inatsisissatut siunnersuut ukiuni qulini maanna suliarineqareerpoq.