Savalimmiuni ikinnerusut tunillatsinnerisa amerlasuullu peqqissinerisa malitsigisaanik tunillatsissimasut amerlassusaata qaffakkiartornerata unippoq. Savalimmiuni tunillatsissimasutut paasineqartut sisamararterutaat sinnilaarlugit peqqisseqqipput.Assi: Anton Gundersen Lihn, KNR

Savalimmiuni tunillatsittut amerliartunnginnerusut: Ungasillisimaallaqqippugut

Savalimmiuni coronavirusip pakkersimaarniarnermut iliuuserineqartoq ajunngitsumik ingerlasoq nakorsaaneq ullualuit tunillatsittoqannginnerunera peqqissisullu amerlanerunerat pillugu oqarpoq

Savalimmiormiut coronavirusimik tunillatsissimasutut paasineqartut ulluni kingullerni siusinnerusumit ikinnerupput, tamatuma saniatigut napparsimasut peqqissisutut nalunaarutigineqartut amerliartorput.

Tamanna Savalimmiunut tunillatsittut piffissap sivikitsup ingerlanerani amerleriapiloornerannik nalaataqaraluartumut nutaarsiassatsialaavoq.

Iliuusissatsialaqarneq ungasillisimaarnerlu

Savalimmiormiut innersuussutinik maleruaalluarnerat oqartussallu iliuusissiarisaata iluatsinnera ajunngitsumik ineriartortoqarneranut pissutaasoq, Savalimmiuni nakorsaaneq, Lars Fodgaard Møller Kringvarp Føroyamut Oqarpoq.

- Savalimmiormiut imminnut ungasinniarnissaminnut pikkorilluarnerat pissutaavoq. Aamma tunillatsissimasunik ujartuinissatsinnut angerlarsimaannartitsinissatsinnullu pikkorissimavugut, Savalimmiuni nakorsaaneq oqarpoq.

- Tunillatsissimasut ulluni kingullerni paasineqarut angerlarsimaffimminni mattusimareerput, taamaammat iliuusissiarisarput ajunngitsumik ingerlasimarpasippoq.

 

Savalimmiuni ikinnerusut tunillatsinnerisa amerlasuullu peqqissinerisa malitsigisaanik tunillatsissimasut amerlassusaata qaffakkiartornerata unippoq. Savalimmiuni tunillatsissimasutut paasineqartut sisamararterutaat sinnilaarlugit peqqisseqqipput.

Nakorsaaneq: Ingerlaannassaagut

Savalimmiormiut oqaatsit allatut atorlugit nunat tamarmik iliuuseriniagaannik iliuuseqarnialeruttorpoq: tassa amerliartornerata appasitsinniarsarinera, taamaaliornikkut peqqinnissaqarfik ilungersuuteqarpallaassanngimmat.

Lars Fodgaard Møllerip Savalimmiuni iliuuserineqartoq ingerlatiinnarneqartariaqarsoraa.

Savalimmiut
Tunillanneqarsimasut: 144
Misissugassamik tigusiffigineqartut: 3120
Ajorunnaartut (tunillanneqarsimareerlutik): 54

Kalaallit Nunaat
Tunillanneqarsimasut: 9
Misissugassamik tigusiffigineqartut: 321
Ajorunnaartut (tunillanneqarsimareerlutik): 2

Paasissutissanik pissarsiffik: corona.fo (marsip 27-ianni 2020), nun.gl (marsip 26-ianni 2020)

- Tuniluuttoqarnissaata kinguarsarneratigut amerlasoorujussuunnginnissaat naatsorsuutigineqassaaq. Taamaammat iliuuserisatta ingerlatiinnarnissaanut pissutissaqarluarpoq, nakorsaaneq savalimmiormiut tv-atigut oqarpoq.

Savalimmiormiut tunillatsissimasinnaasutut pasitsaanneqartunut iliuusissaq sakannersoq atorlugu misissuiffigisaqattaarpaat. Oqartussat ulluni qassiiusuni inuit ullormut 300-it tikillugit misissortarpaat.

Nunatsinni aamma peqqisseqqittoqartoq

Savalimmiuni marsip ulluisa 27-anni misissorneqartut katillugit 3120-iupput, taakkulu tassa innuttaasut 6 procenteralugit. Savalimiut nunarsuarmi nunani innuttaasoqassuseq aallaavigalugu misissuinerpaat ilaanniippoq.

Nunatsinni iliuuserineqartoq tassunga assinguvoq. Assigiinngissutaali uani tassaavoq nunatsinni inuiaqatigiinni killeqarfinnilu siusinnerusumi mattussisoqarmat.

Nunatsinni tunillatsissimasut ilaat aamma peqqisseqqittutut nalunaarutigineqarput.

 

Isummersuutit