Savalimmiuni Torshavn piuneerussaangajattoq
Savalimmiuni illoqarfiit pingaarnersaat Torshavn ataaseerneqangajalluinnarsimavoq.
Savalimmiuni sullivinnik misissuisartut Torshavnimi sissiukkamiittoq containeri ammaramikku nuannerpallaanngitsumik siumuipput, containerimmi iluaniipput qaartiterutissat 16-t.
Savalimmiuni radiukkut sullivinnik misissuisartut nassuiaanerat naapertorlugu qaartiterutissat ima annertutigipput, qaarsimasuugaluarpata ima ajortigisumik kinguneqarsimassagaluartoq allaat Torshavni piuneerussimassagaluarluni.
Sullivinnik misissuisartut nalaatsornerulluinnartumik qaartiterutissat taakku qaammatit marluk missaanni containerimiissimasut siumorpaat.
Taakkulu nioqqutissanik eqqussuisartunit umiarsuarmik Savalimmiuliaanneqarsimasut oqaatigineqarpoq. Malittarisassallu naapertorlugit piaarnerpaamik aaneqarsimasussaagaluarput ungasissumullu inunnit najugarineqanngitsuliaanneqarsimasussaagaluarlutik. Maannali tassa inuit najugarinngisaannukaanneqareersimasut erseqqissaatigineqarpoq aammalu tamanna politiinit suliarineqalersoq oqaatigineqarluni.
