Savalimmiuni toqutsineq tupaallaatigineqarpoq
Angut 32-nik ukiulik ippassaq tigusarineqartoq toqutsisimasutut imaluunnit toqumik kingunilimmik persuttaasimasutut, pasisaalluni ulluni 14-ini tigummigallagassanngortinneqartoq, aviisimi Jyllandspostenimi allaaserineqarpoq.
Ippassaq killisiuineq matoqqasumik pivoq. 32-nik ukiulik, savalimmiormiuunngitsoq, pinngitsuunerarpoq tigummigallagassanngortitaaninilu Landsretimut ingerlateqqillugu.
Toqutaasoq tassaassangatinneqarpoq taassuma arnaataata uigisimasaa, 42-nik ukioqartoq, Jyllandspostenimili allaaserineqartut naapertorlugit toqungasup timaanik nassaartoqarsimanngilaq.
Aviisimi allassimasut naapertorlugit angutip arnaatigisimasaata uigisimasaa, aappariit ataatsimut najugarisaanni, unnerluunneqartullu maanna iserterfigisaani, najugaqarsimavoq.
Atlantikup avannaatungaani qeqertani kingullermik toqutsisoqarpoq ukioq 1988, qeqertami Suderømi angutip inuusuttup sangialluni arnaatini toqummagu.
Maanna suliassamut atatillugu politiit teknikkikkut paasiniaasartui Danmarkimeersut savalimmiormiut paasiniaaneranni ikiuupput.