Savalimmiuni suliumajunnaarnissamik aarlerisaaruteqarput

Savalimmiuni inatsisartut nunanit allanit sulisussanik isaatitsinissamut akuersissappata, sulisartut kattuffii suliumajunnaarnissaminnut aarlerisaaruteqarput. Kattuffiit aarleqqutigaat inatsisissatut siunnersuutigineqartoq akuersissutigineqaraluarpat maannamut atugassarititaasut pillugit sorsuutigisimasamik qarajarneqarnissaat.
maajip 07-at 2008 17:12

Torshavnimi sulisartut peqatigiiffianni siulittaasoq, Hans Joensen, oqarpoq, Savalimmiuni sulisartut peqatigiiffiisa nunanit allaneersut suliartortarnissaat ajorinngikkaluarlugu, sulisitsisunit salliutinneqartalernissaat aarlerigalugu. Taamaammat piumasarineqarpoq nunanit allanit suliartortut savalimmiormiusulli aningaasarsiaqartarnissaat inatsimmi ersarissumik qulakkeerneqassasoq.

Savalimmiormiut 1,3 procentiinnai suliffeqanngimmata avataanniit suliartortoqarnissaa assut pisariaqartinneqarpoq. Pissutsilli Kalaallit Nunaannisuulli immata nunasigallarnissamut sulisinnaanermullu akuersissutit Danmarkimi naalakkersuisunit akisussaaffigineqarlutik sivisuumik allaffissornikkut nalilersorneqartarput, tamatumalu nunanit allaniit suliartornissaq kajuminnarunnaarsittarpaa. Inatsimmi siunnersuutigineqartumi suleriaatsip eqaallisarneqarnissaa siunertaagaluartoq, sulisartut kattuffiisa nunanit allanit nunasiniartunut naliliisarfimmi sinniisuutitaqarnissartik qulakkeerusuppaat. Tamannalumi naalakkersuisut aamma siunertaraat, taannaluuna piviusunngortinneqanngippat sulisartut

suliumajunnaarniarlutik aarlerisaaruteqartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq