Savalimmiuni suliumajunnaanngiinnarput
Savalimmiuni suliumajunnaarnissarsuugaluaq pinngitsoortinneqarpoq, illuatungeriit aningaasarsiat pillugit isumaqatigiissuteqarmata.
Savalimmiuni Sulisitsisut Peqatigiiffiat kattuffiillu namminersortuni sulisunik ilaasortallit ukiunut pingasunut tullernut atuuttussamik ippassaq atsioqatigiissuteqarput, Ritzau taama allappoq.
Suliumajunnaartoqartinnagu aningaasarsiat pillugit naggammik isumaqatigiinniarneq ataasinngormat ualikkut aallartimmat illuatungeriit imminnut assut ungasissimagaluarput.
Imami suliumajunnaartoqarnissaa qanitsigilersimagaluarpoq, allaat inuit inuussutissanik soorlu naatsiianik, qaqorteqqasunik, iffiukkanik, qajuusanik qapunnik aamma orsussanik eqqanaarsareersimagaluarlutik.
Savalimmiuni sulisitsisut nuannaaqalutik nalunaarput, sulisartup tiimimusiai 7 koruuningajalluinnarmik, tassa 6 koruuni 96-imik qaffattussanngortut, soraarnerussutisiat aamma tre procentimik qaffassallutik.
