Savalimmiuni suliffissaaleqisut ikiliartuinnarput

Allattoq Mads Lynge
juulip 20-at 2007 06:27

Savalimmiuni suliffissaaleqisut ikiliartuinnarput, nunanilu Europamiittuni ikinnerpaajullutik.

Europami qanoq suliffissaaleqisoqartiginersoq Savalimmiuni naatsorsueqqissaartarfiup misissorsimavaa, nunallu 35-t misissuiffigisimallugit.

Savalimmiuni suliffissaaleqisut maanna 1,5 procentiupput, Europami nunat ataasiakkaat inuttussusaat ataatsimut isigissagaanni Savalimmiormiut sullarinnerpaajupput.

Savalimmiuni suliffissaaleqineq appasittorujussuartut nalilerneqarpoq. Nunat assigiinngitsut suliffissaaleqisortai 2 procentinit ikinnerusut qaqutigoortorujussuusut Savalimmiuni naatsorsueqqissaartarfiup ilisimatitsissutigaa.

Nunat avannarliit ataasiakkaat alakkarteraanni nunatsinni suliffissaaleqineq annertunerpaanut ilaavoq, tassa nunat suliffissaaleqinermik eqqugaanerpaat tulliattut Kalaallit Nunaat inissisimagami.

Suliffissaaleqisut nunatsinni 7,4 procentiupput, Finlandimilu suliffisaaleqineq 8,5 procentiulluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq