Savalimmiuni sakkutooqarfeqarneq minnerpaaffimmiilissaaq. Illersornissamut Qullersaqarfiup sulisut ikilisarnissaanik pilersaarutai Savalimmiuni naalakkersuisut akueraat.
Illersornissamut Qullersaqarfiup siunnersuutigisimavaa akilersinnaanerussasoq, Savalimmiuni Kalaallit Nunaannilu imaatigut alapernaarsuinerit, Imarsiornermut Sakkutooqarfimmit Århusimiittumit aqunneqalerpata.
Maanna Savalimmiuni Sakkutooqarfik, NATO-p sakkutooqarfiani Mørkedal-imiittoq, tassa qeqertami Strømø-miittoq, sulisumigut ikilisaaffigineqartussanngorpoq.
Savalimmiuni Radiop nalunaarutigaa sulisut ullumikkut 24-iusut arfiniliinnanngussasut.
Nunatsinni Kangilinnguani sakkutooqarfik sipaarniarfiussanngilaq.
Illersornissamut Qullersaqarfik tusarniaammat Namminersornerullutik Oqartussat ikilisaanissaq kissaatiginagu nalunaarsimapput. Sulialli qanoq aaqqissuunnissaannut tunngasut suli isumaqatigiinniutigineqartut, Kangilinnguani Sakkutooqarfimmi tusagassiuutinut attaveqaataasartoq Alex Jensen oqarpoq.