Savalimmiuni saarulleerunnissaa ernummatigaat
Savalimmiut imartaani aalisarnerup unitsinneqarnissaanik Imavinni Misissuinerit pillugit nunat tamalaat Siunnersuisartoqatigiiffiata, ICES-ip, innersuussutaa piviusunngussappat, aalisariutaatillit ningittagarsortullu angallatitik talittarfimmiitiinnartariaqassavaat.
Savalimmiut imartaani tamarmi saarulleqassusia eqqarsaatigalugu ukiuni tulliuttuni saarullinniartoqannnginnissaa ICES-ip ungasinngitsukkut siunnersuutigaa.
Tamaani saarullinniarnerup unitsinneqarnissaa ICES-ip ataasiaannarluni siunnersuutigereerpaa, tassa Savalimmiuni 1991-imiit 1992-imut ajornartorsiortoqarmat.
Aalisakkanik ilisimatooq, Jákup Reinert, Savalimmiuni Aalisarnermut Misissuiffimmeersoq, ICES-ilu Københavnimi qanittukkut ataatsimiimmat peqataasoq, Savalimmiut Radioannut oqarpoq, saarulliit imartaminni suffisarnerat ima annikillisimatigisoq, Savalimmiuni saarullinniartoqannaassappat qanoq kinguneqassanersoq Imavinni misissuinerit pilugit nunat tamalaat Siunnersuisoqatigiiffiata ilisimanngikkaa.
Uumasuaqqat immap ikerinnaaniittut, saarulliit immap naqqani nerisaannut attuumassuteqarluinnartut, aamma ikilisimasut Jákup Reinertip ilanngullugu tikkuarpaa, taakkulu ukiuni tulliuttuni amerlinissaat ilimaginngilaa.
