Folketingimut qinersineq 2015 Savalimmiuni qinigassanngortittorpassuit

Savalimmiormiut Folketingimut iserniuttut amerlapput. Nunatsinnit qinigassanngortittut 17-iusut Savalimmiormiut 64-it qinigassanngortipput.
Assi © : Stig Nygaard/Flickr Creative Commons
juunip 09-at 2015 14:11

Savalimmiut 50.000-it ataatilaarlugit inoqartoq arfineq marlunnik parteeqarpoq, taakkunannga Sambandsparti, Kaj Leo Holm Johannesenimit siulittaasuuffigineqartoq annersaalluni. Taakku qinigassanngortitaat 14-iupput, taamaalillutik Folketingimut 2011-mi qinersinermi ataatsimik ilaasortaatitaqalernertik attatiinnarniartussaassallugu.

Folkeflokken, Republikanerit taamatullu Socialdemokraatit tamarmik aqqaneq marlunnik qinigassanngortitaqarput. Socialdemokraatiniit Folketingimi maanna ilaasortaasoq, Sjurdur Skaale qineqqusaartunut aamma ilaavoq.

Partii Fremskridtimiit arfinillit qinigassanngortipput, Centerpartiimiit pingasut Selvstyrepartiimiillu marluk qinigassanngortillutik.

Partiit avataasigut kisimiilluni qinigassanngortittoq ataasiinnaavoq, tassalu Zakarias Wang. Taassuma qineqqusaarnissaminut atsiornerit 155-it pissarsiarai taamaalillunilu tassa qineqqusaartunut akuulluni.

Savalimmiormiut Nunatsinnisulli marlunnik Folketingimi aamma ilaasortaatitaqartarput.

Folketingimut 2011-mi qinersinermi Sambandspartii 31 procentinit qinerneqarlutik Folketingimut ilaasortaatitaqalerput, Edmund Joensen taamani qinigaalluni. Socialdemokratit taamani sassartitaat, Sjurdur Skaale 21 procentinit qiningaalluni aamma ilaasortanngortoq.