Savalimmiuni piseqqusaarutit allamiutut oqaasertallit inerteqqutaalerput
Savalimmiuni tuniniaanermi periuseq pillugu inatsisartuni siunnersuutigineqartup, isumaqatigiissutineqartullu kingunerissavaa, piseqqusaarutit savalimmiormiutut allassimasut kisimik agguaanneqarlutillu takoqqusaarutigineqartalissammata.
Piseqqusaarutit pillugit inatsisip atuutilersinneqarneratigut, Danmarkimi niuertarfiit Savalimmiuni immikkoortortaqarfeqartut piseqqusaarutitik qallunaatut allanneqartut savalimmiuni illunut agguaasinnaajunnaassavaat.
Savalimmiormiutut allassimanngitsunik piseqqusaarutinik inerteqquteqalerneq ilaatigut Savalimmiuni oqaatsit pillugit polikeqqarnerup ilagivaa.
Oqaatsit pillugit isumaliuttissiissutip juulli sioqqullugu pisortatigoortumik saqqummiunneqartup siunertarivaa, savalimmiormiut oqaasii Savalimmiuni inuiaat oqaasiattut pingaarnertut inissisimalernissaat.
Oqaatsit pillugit isumaliutissiissutip atuutilersinneqarneratigut, savalimmiuni naminersornerulluni oqartussaaneq pillugu inatsisip Danmark-illu akornanni isumaqatigiissutigineqartup saneqqutaarniarneqarpoq.
Inatsit taanna malillugu, Savalimmiuni savalimmiormiut oqaasi pingaarnertut akuerineqassapput, qallunaatulli oqalussinnaanissaq ilinniarluarneqassaaq, qallunaallu oqaasii savalimmiormiutulli atorneqartigalutik pisortani atorneqassapput.
Nunarsuarmi tamarmi savalimmiormiut oqaasii 70.000-init atorneqarpoq. Taakkunannga 48.000it savalimmiuni najugaqarlutik. Savalimmiormiut oqaasiisa ineriatortinneqarnissaat paarilluarneqarnissaallu pillugit Savalimmiuni piumassuseqartoqarpoq.
Tamannalu tunngavigalugu naatsersuutigineqarsinnaavoq, piffisami qanittumi savalimmiormiut oqaasii pisortatigoortumik atorneqalernissaat pillugit inatsisiliortoqarnissaa, nutaarsiassaqartitsivik ritzau allappoq.
