Savalimmiuni pinerluuteqarsimasut marluk parnaarussassanngortinneqartut

Angut 21-nik ukiulik inoqamminik persuttaasimasutut illumillu ikuallaariarsimasutut eqqartuussivimmi aalajangeeqataasussanit aqqaneq-marlunnit ukiuni marlunni qaammatinilu marlunni parnaarussassanngortinneqarpoq. Sapaatip-akunnerata naanerani eqqartuussisoqarpoq.

Angut 21-nik ukiulik toqutseriarsimasutut pinngitsuutitaavoq, naak angutip, ukiukitsunik atornerluiniartartutut isigisani ulimaammik nassarluni iserfigisimagaluaraa.

Eqqartuussineq alla ullumi aamma pivoq, tassani angut islandimiuusoq Savalimmiuni eqqartuussivimmit ukiuni qulingiluani affarmilu parnaarussassanngortinneqarpoq. Angut iisartakkanik ikiaroornartunik amfetamininik 24 kiilunik, ecstasynik iisartagaliassanik 15 kiilunik iisartakkanillu ecstasynik 1.749-nik nassiussanik tigusisuullunilu toqqortaqarsimasutut pineqaatissinneqarpoq. Angut Islandimi arlalinnik suleqateqarsimavoq, arlallillu pineqaatissinneqareerput.

Savalimmiuni pineqaatissiissutit ukiunit sisamanit sivisunerusussaagaangata, eqqartuussivimmi aalajangeeqataasartut atorneqartarput.

Ukiuni 30-ni kingullerni eqqartuussivimmi aalajangeeqataanerit tallimaannaat pisimapput.

Savalimmiuni ukiuni 20-ni toqutsisoqarsimanngilaq, toqutsineq kingulleq Suderømi 1988-imi pivoq, taamani angutip inuusuttup sangiannini pissutigalugu arnaatini toqummagu.