Savalimmiuni Nuummilu meeqqat inuusuttullu immikkut pisariaqartitsisut sungiusaqatigiittut
Savalimmiuni timersoqatigiiffik Eydnudeild Færoyar Nuummilu timersoqatigiiffik NÛK Håndbold Starz misilittakkaminnik avitseqatigiillutik ulluni makkunani sungiusaqatigiileruttorput.
- Maannakkut timersoqatigiiffiit marluulluta ataatsimoorfigisartakkatsinnut Lykkeligamut, Danmarkimi ukiut qulingiluat matuma siorna aallartittumut ilaavugut. Taanna meeqqanut inuusuttunullu immikkut pisariaqartitalinnut assammik arsarluni unammiuaarfiusarpoq.
Morten Hust Petersen Savalimmiuni Eydnudeild Færoyarimi sungiusaasoq oqarpoq.
NÛK Håndbold Starzimi assammik arsartartut Savalimmiunut upernaaq manna poorskimi tikeraarput. Avitseqatigiinnissaq sungiusaqatigiinnissarlu pingaartillugit Nuummiillutik Morten Hust Petersenip aamma oqaatigaa.
- Savalimmiuni avinngarusimasumiikkaluarluta Nuummiut uagullumi Danmarkiliaqqaanngikkaluarluta unammiartornissamut periarfissaqartarnissaat pingaaruteqarluinnartoq isumaqarpunga.
Peqataasunit nuannaarutigineqartoq
Liv Nuunu Pedersen NÛK Håndbold Starzimi assammik arsartarpoq. Savalimmiuniillu tikeraartoqarnerminni sungiusaqatigiinnerit unamminerillu nuannaarutigai:
Assamminguna arsarlusi sungiusaqatigeeqqammertusi?
- Aap.
Peqataalluni nuannerpaa?
- Aap.
Liv Nuunu Pedersenillu anaanaata Helle Pedersenip sungiusaqatigiinnissamut periarfissaqartinneqarnerat aamma nuannaraa:
- Nuanneqaaq, qiimmassaataaqaaq upernaaq Savalimmiunut unammiartornikuugamik taava Savalimmiormiut aalajangeramik maannga tikeraarniarlutik nuannisaqaat, Helle Pedersen oqarpoq.
Taamalu tikeraartoqarnermi avitseqatigiittarlutik Helle Pedersenip aamma oqaatigaa:
- Avitseqatigiittarpugut taamatut naapeqatigiikkaangatta angajoqqaatut.
Tammajuitsussanik saqqarmiunnattut
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Nivi Olsen malinnaajartorpoq.
- Innarluutillit maani ataatsimoortut timersortut unammiuaartut isiginnaariarpakka najuukkiartorlunga aamma Savalimmiuninngaanniit tikeraaramik Lykkeligamik suleqatigiiffik innarluutillit ataatsimoorlutik ataatsimoorfiat maani massakkut katerisimaarput taamaammat peqataajartorpunga.
Immikkullu pisariaqartitsisut inuiaqatigiinnut akuutinneqarluarnissaat pisariaqartoq Nivi Olsen isumaqarpoq.
Tikeraallu nunatsinniissimanerminnut takussutissanik saqqarmiunik tammajuitsussaannik naalakkersuisumik tunineqarput.
- Imaattunik sanatitsinikuuvugut saqqarmiunnguit Lykkeligamik allaqqavoq, taava Sermitsiaq assitaliullugu, Kalaallit Nunaanniissimaneranni tammajuitsussaannik tunerusullugit sanatitsivugut.
Savalimmiuniit tikeraartut aggustip pingajuanniit arfineq pingajuata tungaanut Nuummiipput.
