Savalimmiuni nakorsaaneq: Tunillatsissimasut nakkutigineqarsinnaapput
Savalimmiuni coronamik tunillatsissimasut aqussinnaaneqaleriartorput. Savalimmiunili nakorsaanerup ernumanartoqarnera suli qaangerneqanngitsoq erseqqissaatigaa.
Savalimmiormiut Nutaasiassaqartitsivia taama allaaserisaqarpoq.
Kisitsisit kingulliit pingasunngornermeersuupput. Kisitsisit nutaanik pingasunik tunillatsissimasunik paasisaqartoqarsimasoq - sapaatillu akunnerata kingulliup ingerlanerani tunillatsissimasut amerlassusaat ikilisimasut takutippaat.
AAMMA ATUARUK Savalimmiuni coronamik tunillaassuuttoqartoq
Savalimmiut coronamik tunillatsissimasoqanngikkaluarpoq, Savalimmiunili tunillatsissimasut 38-t aggustip ulluisa arfernanni paasineqarput. Tamanna qaffariarnerujussuuvoq.
Nunatsinni mattussimasoqassallunilu misissortittoqassasoq
Savalimmiuni nakorsaanerup, Lars Fodgaard Møllerip oqarnera naapertorlugu tunillatsissimasut ullormi ataatsimi paasineqartut aatsaat taama amerlatigipput.
Savalimmiuni Olajimik taallugu inuiattut juulip ulluisa 28-anni 29-annilu nalliuttorsiortoqarnerata kingorna tunillatsissimasut amerliartuleraluarput. Olajfestip kingorna coronamik tunillatsissimasut 115-it paasineqarsimasut kisitsisit nutaat takutippaat.
- Nunap immikkoortuani tunillatsissimasut siaruaattoqartoq takusinnaavarput, kisianni aamma tunillatsissimasut ikiliartorput, tamanna nuannaarutigaarput. Aammattaaq savalimmiormiut pissutsit ilungersunartumik tigullugit mianersortut kisitsisit takutippaat, nakorsaaneq, Lars Fodgaard Møller Savalimmiormiut nutaarsiassaqartitsivianut oqarpoq.
AAMMA ATUARUK Malittarisassat nutaat: Savalimmiunit nunatsinnut angalasunut killilersuisoqaqqilersoq
Savalimmiuni inuit 900-it sinneqartut angerlarsimaffimminni maanna mattusimapput.
Savalimmiuni sapaatip-akunnerata siuliani tunillaassuuttoqarnerulernera pissutigalugu Norgep Savalimmiunut angalanerit innersuussutigiunnaarpai.
Naalakkersuisut Savalimmiunit angalasut sapaatini akunnerni marlunni mattusimassasut imaluunniit nunatsinnut tikinnerminnit ullut tallimat qaangiunneranni misissortittassasut marlunngormat aalajangerpaat.