Savalimmiuni naalakkersuisut ikinnerussuteqarput

Sulluliap immap naqqatigoortup sananeqarnissaa matumani qitiuvoq.

Socialdemokratit sinnerlugit Sandømiit ilaasortap Gerhard Lognbergip naalakkersuisoqatigiinni ilaasortaajunnaarnerata kingunerisaanik naalakkersuisoqatigiit ikinnerussuteqalerput.

Savalimmiuni tv-qarfiup nutaarsiassalerinermut pisortaq Øssur Winthereig ullaap tungaa oqaloqatigaarput, politikkikkullu aaqqiagiinngissutit ima nalilerpai:

- Sandøp tungaanut immap naqqatigut sulluliorniarneq politikkikkut taama oqallisaatiginera Savalimmiut avataaniit paasiuminaassinnaagunarpoq. Sandøp tungaanut sulluliortoqarnissaa Gerhard Lognbergip attattuarsimavaa, lagtingimullu qinersisoqareernerup kingorna sulluliornissaq pillugu lagtingimi amerlanerussuteqartut tapersersunngimmassuk, Lognberg, naalakkersuisoqatigiinnit tunuarnera ikinnerussuteqalersitsivoq, Øssur Winthereig oqarpoq.

Polikkikkut tulleriaarinerit naapertorlugit apeqqutaaginnassaaq Sandøp tungaanut sulluliortoqassanersoq. Sulluliaq 750 millioni koruuninik akeqassangatinneqarpoq, naalakkersuisoqatigiinnili aningaasat taakku allanut atorneqarnissaat siunniunneqarpoq, soorlu kulturimut, ilinniartitaanermut, ilisimatusarnermullu. Taamaammat sulluliornissamut akissaqartoanngilaq, Øssur Winthereig oqarpoq.

Politikkikkut maanna qanoq pisoqassanersoq suli nalunarallarpoq.

Naalakkersuisoqatigiilli ikinnerussuteqarlutik ingelaqqiinnarsinnaanersut, illuatungiliuttuniluunniit tapersersortissaqarsinnaassanersut, Savalimmiuni naalakkersuisut siulittaasuata Jóannes Eidesgaardip paasiniarniarpaa.

- Taamaattoqarsinnaanngippat lagtingimut qinerseqqittoqartariaqassaaq, Øssur Winthereig oqarpoq.