Savalimmiuni naalakkersuisut ajornartorsiorput

Illuatungiliuttut naalakkersuisooqatigiinniillu ataatsip inatsisissamik siunnersuutaat Lagtingimi akuerineqareersorlu Savalimmiuni naalakkersuisut avissaartuuteqaajaapput. Aalisagartassiissutit ikileriarujussuarnissaat siunnersuutigineqarluni taasissutigineqarmat, aalisarneq pillugu akisussaasuusut, Republikanerit, taamaalillutik ajorsarput.
aggustip 16-at 2008 13:28

-Aalisarnermut tunngassuteqartut taama pingaaruteqartigisut pillugit naalakkersuisooqatigiinni isumaqatigiittoqanngippat Republikanerit issiaannarsinnaanngillat, Republikanerit siulittaasuat, Høgni Hoydal Lagtingip oqaluttarfianiit oqarpoq.

Aalisagartassiissutit naalakkersuisut piumasaannit annikinnerusumik appartinneqarnissaat siunnersuutigineqarmat parteeqataa, Heine O. Heinesen, aalisartunit aalisariutaatilinnillu tapersersorluarneqartoq, taaseqataavoq. Ullut aalisarsinnaatitaaffiit 20 procentimik appartinneqassasut naalakkersuisut siunnersuutigigaluarpaat, Heine O Heinesenilli illuatungiliuttullu 10 procentiinnarmik appartinneqarnissaat akuersissutigaat.

Republikanerit naalakkersuisooqatigiinnit tunuassanersut siulittaasup pisortatigoortumik suli nalunaarutiginngilaa. Republikanerini siulersuisuunerit Høgni Hoydalip ataatsimiigiaqqunikuuvai.

Aviisi Sosialuren qinersisartunik isumasiuisitsimmat, tamanut ippassaq saqqummiunneqartumi, takuneqarsinnaavoq, savalimmiormiut amerlanersaasa Republikanerit tapersersoraat, Republikanerimmi oqarput immap uumasuinik ilisimatuut peqqussutaat Lagtingimit tusaaniarneqarpallaartut.