Savalimmiuni naalakkersuisoqatigiit atorunnaarsinneqarput

Naalakkersuisut atorunnaarsinneqarnerannut pisortatigut pissutaannerarneqartoq eqqumiiginarsinnaavoq, tassa Joannes Eidesgaard nalunaarmat inatsisartut illutoqaanni, Tinganesimiittumi init ilaat Republikanerit siulittaasuata, Høgni Høydalip nammineq atorniarlugu Joannes Eidesgaardip iserterfigeqinammagu matuersaaserisoq ikiorsiullugu matuersaaserfia taarserniarsimavaa. Taamatut pissusilersorneq Joannes Eidesgaardip naalakkersuisut siulittaasuattut piginnaatitaaffimminik ataqqinninngitsutut iliuuseqarnertut taallugu ualigaa tusagassiuutinik katersortitsigasuarnermini naalakkersuisut atorunnaarsinnerannut peqqutiginerarpaa. Høgni Høydalili oqarpoq aappagumut aningaasartuutissat pillugit inatsisissaq isumaqatigiissutigisinnaannginnamikku inilerngusaannermut saatinniarsaralugu Joannes Eidesgaard naalakkersuisut atorunnaarsinniarlugit utoqqatsissutissarsiortoq. Savalimmiuni qaammatit arfineq marluk matuma siorna qinersisoqareernikuummat Joannes Eidesgaard qinersisitsinani partiit allat peqatigalugit naalakkersuisunngortitsiniarniarluni oqarpoq.