Savalimmiuni ministeri akuliuppoq

Anguteqatiminnik arnaqatiminnillu atoqateqartartut Savalimmiuni inuttut pisinnaatitaaffeqannginnerujussuat pillugu, Nunat Avannaamioqatigiit suleqatigiinnerannut ministeri, Jógva á Lakjuni, Nunat Avannarliit Siunnersuisoqatigiivisa Københavnimi ataatsimiinneranni, ullumi akuliuppoq.

Danskit tusagassiorfii Savalimmiunut malersuinerarlugit savalimmiormiut ministeriat oqarpoq, tikkuarpaalu, apeqqutip Savalimmiuni Inatsisartuni sapaatip akunnerani uani suliarineqarnissaa inassutigisimagini. Nunat Avannarliit Siunnersuisoqatigiivinut ilaasortat Savalimmiunut taama uparuaanerat ajuallannartuunerarpaa, apeqqutillu Inatsisartunut ingerlateqqinneqarnera qalleqqissaatigalugu.

Savalimmiuni pisup inatsisiliornermi upperisamut sunniuteqarnera savalimmiormiut Foplketingimut ilaasortaatitaata, Republikanerit siulittaasuata, Høgni Hoydalip, assorsuaq akerleraa.

- Arnaqatiminnik anguteqatiminnilluunniit atoqateqartartut pillugit apeqqut partiitta saqqumiuppaa, inuttut pisinnaatitaaffiit pillugit akisussaassuseqanngitsutut Atlantikup Avannaani isigineqarusunnginnatta. Nunarsuarmioqatitsinnit avissaavilluta nammineerusunngilavut, kisianni, Høgni Hoydal oqarpoq, nangillunilu:

- Nunarsuaq tamakkerlugu isumaqatigiissutinut malinnaassalluta ullumikkut pisussaatitaanngilagut – taamaammat nunarsuarmioqatitsinnit siusinnerusukkut pinngitsaalineqarnikuunngilagut. Namminiilivinnissarput eqqarsaatigigaanni, akisussaassuseqanngitsumik maanna iliorneq tamanut tunuliaqutaavoq. Imaanngilaq nunarput pingaartikkusoqigipput, kissaatigiinnarparpulli nunarsuaq tamakkerlugu akisussaassuseqarnerup Savalimmiunut aamma anngunnissaa, Høgni Hoydal Nunat Avannarliit Siunnersuisoqatigiivisa oqallinneranni oqarpoq.