Savalimmiuni malissuartorsuulluni tassaarnersuaqarpoq

Taama nalinginnaanngitsumik Savalimmiuni pisoqarneranut suna peqqutaasimasinnaanersoq suli ilisimaneqanngilaq. Savalimmiunilu nukissiornermik pisortaqarfiup nunaqarfimmi innuttaasut kangerluup tungaanut sissamukarnaveersaaqquai.

Ippassaq pingasunngornermi ualikkut Hvannasundip imartaa mallileriataarsimavoq, taamaalineranilu sila atoruminarpoq anoreqaranilu, kangerliumanerlu mallileriataarnissaata tungaanut qatsungalluinnarsimagaluarpoq. Akunnialuinnaalli qaangiuttut imaq mallertorujussuanngorsimavoq mallileraluttuinnaramilu umiarsualivik kiisa meterinik pingasunik qaangerlugu angusalersimallugu. Naggataatigullu kiisa umiatsiat umiarsualivimmut kallussaattorujussuanngorsimapput imarlu tinikkiartuleraangat aalisakkat nunap qaani pikittut takussaalertarsimapput.

- Naluarput taama pisoqarneranut sumik peqquteqarsimassanersoq, imaassinnaavoq immap iluani nunamik sisusoqarsimasoq kisianni taamatut isumaqarnerput suli eqqoriaanerinnaavoq, taama Ritzauimut oqarpoq Savalimmiuni pinngortitaleriffimmi pisortaq Lis Mortensen.

Savalimmiuni nunaqarfiit ilaanni tassaarsuaqaleriataarneranut atatillugu inunnik ajoqusertoqarsimasorineqanngilaq.