Savalimmiuni kapisilinnik tunisassiorfik aatsaat taama sinneqartooruteqartigisoq
Danskit aviisiat Børsen taama allaaserisaqarpoq.
Ingerlatseqatigiiffik 2015-imi 0,8 milliardit koruunit missaannik sinneqartooruteqarpoq 2016-imilu 1,3 milliardit koruuninik sinneqartooruteqarluni.
Qaffariaataasoq 63 procentiuvoq.
Ingerlatseqatigiiffiup pisortaanera naapertorlugu niuerfimmi pitsaasumik ineriartortoqarnera angusarissaarnermut pissutaaqataavoq, naak 2016-imi ukiup siulianut naleqqiullugu tunisassiat ikinnerugaluartut.
Suliffissuartaaqqilersoq
Suliffissuartaassallu atulerneratigut tunisassiornermut aningaasartuutit ikiliseqqinneqarsinnaanissaat pisortaanerup naatsorsuutigaa, ingerlatseqatigiiffiup nittartagaatigut taama nalunaaruteqarpoq.
Bakkafrost aamma allappoq kapisillit piumaneqarnerulernerisa tamatumalu peqatigisaanik niuerfimmi ikinnerulernerat pissutigalugu kapisilinnut akit qaffakkiartorsimasut.
Chilemi immap naasuinik naasoortoqarneratigut aalisakkat 25 millionit tunisassiarineqanngitsoorsimappat, tamannalu pissutigalugu nunarsuaq tamakkerlugu niuerfimmi kapisillit pissarsiarineqarsinnaasut ikileriasaarsimallutik.
Bakkafrost allappoq siunissami assingusumik pisoqaqqissinnaanera naatsorsuutigineqarsinnaanngitsoq.