Savalimmiuni innuttaasut amerliartunngillat

Taava Savalimmiunut, Europami nunat akornanni Savalimmiuni inunngortoqarnerpaasarpoq.
decembarip 27-at 2010 16:25

Taamaakkaluartorli Savalimmiuni inuit amerliartunngillat, inuusuttummi nunaminni ilinniagarerusutaminnik ilinniarsinnaannginnamik suliffigerusutaminnillu suliffeqarsinnaannginnamik nunartik, ineriartorunnaarsimasoq, qimallugu allamut nuuttarput.

Nunanut allanut nuuttarneq Savalimmiuni inuiaqatigiinnut ajornartorsiutaasoq inuiaqatigiit pissusiinik misissuisup inuusuttullu pillugit ilisimatusartup Savalimmiormiup isumaqatigaa. Ajornartorsiummulli aaqqiisoqarniarluni iliuuseqartoqanngilaq.

- Savalimmiut siunissaannut apeqqut pingaaruteqarpoq, ajoraluartumilli oqallisigineqarneq ajorluni. Ilisimatusartoq oqarpoq.

Inuusuttorpassuit Savalimmiunit nuuttarnerat uteqqittannginnerallu oqallisigineqarneq ajormat, Savalimmiuni inuiaqatigiinni ineriartortitsiniarluni iliuuseqartoqarneq ajorpoq.

Taarsiullugulu aalisarneq inuiaqatigiinnik kivitsisussatut aningaasaqartitsisussatullu, inuussutissarsiorneq taanna ilungersunartorsiorfiugaluartoq inuusuttunillu soqutigineqanngikkaluartoq, tamaviaarluni aalajangiusimaannarneqarpoq.

- Qaffasissumik ilinniagaqarneq ajortut inuiaqatigiinni suliffissani kinguariartortuni sulilersarput, inuiaqatigiinnili suut ineriartortissanerlugit suli oqaluuserinngilagut, inuiaqatigiit pissusiinik ilisimatusartoq oqarpoq.

Taamannalu Magni Laksafossip isumaqatigaa.

Magni Laksafoss Savalimmiuni politikeriuvoq, aningaasaqarnermullu ministeriusimalluni, inuusuttullu Savalimmiunit nuuttartut uterteqqinniassallugit politikereqatinilu iliuuseqartussaalluni nalunngilaa, sunalu pisariaqartinneqarnersoq qularinngilaa.

- Savalimmiunut uteqqinnissaannut peqqutissaqartilissavagut. Nunarput soqutiginartuusoq inuusuttut eqqarsalersissavagut. Ineriartorfiussaaq, aaqqissuusseqqinnernik suliaqartoqassaaq, inuussutissarsiornikkut allanngortiterisoqassaaq aningaasaqarniarnerlu qaffakkiartorpat taava inuusuttut uteralissapput, taama iliuuseqassasugut isumaqarpunga, Magni Laksafoss oqarpoq. - Taamaaliorsinnaagaluarluta iliuuseqanngilagut, nangippoq.

Magni Laksafoss Savalimmiuni naalakkersuisoqatigiinni ilaasortaavoq. Inuusuttullu nuuttarnerisa ajornartorsiutaaneranik nassuerutiginnittunut ikittunnguanut ilaalluni.

Qanoq ililluni inuusuttut utertinniarneqarsinnaanerannik siunnersuutissaqarpoq. Iliuuseqarsinnaasunullu ilaalluni. Iliuuseqartoqanngilarli. Magni Laksafossimi naalakkersuisooqatigiinnut ilaagaluarluni, politikkeritut aaqqissuusseqqikkusuttutut, Savalimmiuni inuiaqatigiinni allanik isumalinnik pissaaneqartoqarpoq.

- Tassalu aalisartut, aalisartuuneq Savalimmiuni pingaartitaavoq. Inuppassuimmi aalisartut inuiaqatigiinni ataqqisassatut isigaat. Ataqqisassanullu ajoqutaasinnaasunik aaqqissuusseqqissinnaanngilagut, nersualaaginnartussaavagut, aalisartut namminneq taama isumaqarput, Magni Laksafoss oqarpoq.

Magni Laksafossip suleqataasalu aalisartut nersualaaginnarpaat, aaqqissuusseqqittoqaranilu, inuiaqatigiillu ineriartorunnaarsimapput, inuusuttullu suli Savalimmiunit nutserput.