Savalimmiuni inatsisartut ilaat partiiminit tunuarpoq

Savalimmiuni inatsisartunut ilaasortaq alla maanna partiminit tunuarpoq, suiaassuseqatiminnik atoqateqartartut pillugit inatsisartut aalajangernerat akerliuffigalugu, tassa Europap avannaamiut allat assigalugit immikkoortitaannginnissamut inatsisitigut illersorneqarnissaat.

Inatsisip akuerineqarneratigut Savalimmiormiut upernaamut taasitinneqaratarsinnaapput aalajangiiffiginiarlugu Savalimmiuni arnaqatigiit imaluunniit anguteqatigiit katissinnaalissanersut aamma meeravissiartaarsinnaassanersut.

Sisamanngornermi inatsisartunut ilaasortaq Alfred Olsen, Sambandspartimeersoq nalunaarpoq, inunnik immikkoortitsinnginnissamik inatsisip annertusineqarnerata akuerineqarnera pissutigalugu partit naalakkersuisoqatigiit tapersersorunnaarlugit. Partit naalakkersuisoqatigiit tassaapput Socialdemokratit, Folkeflokken aamma Sambandsparti.

Taamaalilluni naalakkersuisoqatigiit inatsisartuni ilaasortanit 32-usunit 20-nik tunuliaqutaqalerput.

Alfred Olsenip aalajangernerminut tunngavilersuutaasa ilagaat “tassagooq sulissutiginiaramiuk Savalimmiuni inuiaqatigiit kristumiussuseerutsinneqannginnissaat”.

Savalimmiuni inatsisartuni inatsimmut akerliusut inunnik taasisitsinissaq sulissutiginialerpaat.